World Vision nia dedikasaun durante tinan 30 apoiu tebes dezenvolvimentu TL
DILI, 02 Outubru 2025 (TATOLI)–Governu liuhusi Vise-Primeiru-Ministru, Ministru Koordenadór Asuntu Sosiál no Ministru Dezenvolvimentu Rurál no Abitasaun, Mariano Assanami Sabino, hateten World Vision nia dedikasaun durante tinan 30 apoiu tebes dezenvolvimentu Timor-Leste nian.
“Ohin, hato’o agradesemtnu ba ezistensia World Vision kompleta ona dékada 30. Lori Governu nia naran, agradese ba servisu no kontribuisaun hotu ne’ebé World Vision fó ba Timor-Leste,” Assanami hateten iha nia diskursu bainhira partisipa aniversariu World Vision ba da-30 ne’ebé hala’o iha salaun Komisaun Nasionál Eleisaun (CNE, sigla portugés), Kaikoli, kinta ne’e.
Nia dehan, World Vision nia servisu durante tinan naruk ho paixaun no abut ne’ebé metin ona iha komunidade nia-leet.
World Vision nia jornada iha Timor-Leste hahú 1995, períodu ida-ne’ebé nakonu ho inserteza no dezafiu boot ba timoroan sira, maibé iha tempu defisíl ita-boot sira-nia organizasaun fó korajen ho dedikasaun ne’ebé extraordináriu. Sira halo servisu la sura kolen hodi promove moris di’ak ba timoroan sira.
“Ami sei la haluha ita-boot sira-nia kompromisu iha tempu pasadu. Ita-boot sira nia kontribuisaun ba Timor-Leste inspira tebes ami hotu hanesan timoroan. Ita-boot sira-nia servisu hadi’a asesu ba eskola, tulun iha setór saúde hodi kombate mánutrisaun no seluk tan,” nia dehan.
Iha fatin hanesan, Diretór Nasionál World Vision Timor-Leste, Jared Berends, hateten durante ezisténsia iha Timor-Leste fó tulun ona ema barak iha área oioin.
“Ho apoiu husi ami-nia parseiru sira-ne’ebé barak mak hamutuk ho ami iha selebrasaun, iha tinan kotuk ami fó apoiu ba labarik liu 20.000 no ema liu 60.000. Ida-ne’e mak buat ida-ne’ebé ami hotu bele orgullu,” nia dehan.
Diretór ne’e, nia dehan, Governu Timor-Leste rekoñese no apresia World Vision nia kontribuisaun sira iha bem-estár infantil, seguransa bee, empoderamentu juventude, saúde, nutrisaun, meiu subsisténsia, resposta ba dezastre no reziliénsia ba klima.
“Ami hein tinan barak tan ba kolaborasaun atu alkansa ami-nia vizaun fahe ba Timor-Leste ida ne’ebé prósperu, inkluzivu no reziliente,” nia hateten.
World Vision Timor-Leste nia estratéjia atuál sentradu iha labarik sira-ne’ebé saudavel no foinsa’e sira-ne’ebé iha kbiit ba komunidade sira-ne’ebé forte.
Ho apoiu husi Governu, sosiedade sivíl, doadór sira no parseiru lokál sira, organizasaun ne’e nafatin iha kompromisu atu asegura katak labarik sira sai boot ho saudavel, foinsa’e sira hetan kbiit atu forma sira-nia futuru no komunidade sai forte no reziliente.
Kona-ba World Vision Timor-Leste
World Vision servisu iha Timor-Leste dezde tinan 1995, halo parseria ho komunidade, Governu no parseiru dezenvolvimentu sira hodi hadi’a moris di’ak labarik nian.
Ninia serbisu foka ba saúde, nutrisaun, protesaun labarik, meiu subsisténsia no resposta emerjénsia. World Vision Timor-Leste oras ne’e daudaun iha eskritóriu iha Aileu, Baukau, Bobonaro, Kovalima, no Oekusi.
World Vision Timor-Leste komemora nia Aniversáriu ba da-30 ho selebrasaun espesiál hodi halibur partisipante liu 230, inklui ofisiál Governu, doadór, parseiru dezenvolvimentu, líder komunitáriu, benefisiáriu no funsionáriu sira.
Eventu ne’e hala’o ho tema “Dékada Tolu, Misaun Ida: Ba Labarik sira, Ba Família sira, Ba Futuru,” tema ne’e destaka World Vision nia viajen dezde nia ezistensia iha Timor-Leste hahú tinan 1995, hodi reflete kona-ba servisu, parseria no impaktu durante dékada tolu iha nasaun ne’e nia komunidade balun ne’ebé vulneravel liu.
World Vision hahú servisu uluk iha Aileu no hafoin ne’e habelar ba Baukau, Bobonaru, Kovalima no Oekusi.
Iha tinan hirak nia laran, World Vision apoia ona komunidade liuhusi tulun emerjénsia, programa dezenvolvimentu ba tempu naruk no inisiativa sira harii reziliénsia nian.
Jornalista : Hortencio Sanchez
Editór : Cancio Ximenes
