DILI, 06 Outobru 2025 (TATOLI)—Sekretáriu Estadu Formasaun Profisionál no Empregu (SEFOPE), Rogério Araújo Mendonça, apela ba traballadór timoroan sira-ne’ebé ba servisu iha Austrália atu evita prátika arte marsiál.
“Traballadór timoroan barak mak inklina-an iha grupu arte marsiál, maibé ita-boot sira tenke hatene katak objetivu imi-nian ba iha Austrália atu servisu no hadi’a moris família nian inklui kria empregu ba imi-nia an bainhira fila mai Timor,” Sekretáriu Estadu informa ba Agência Tatoli iha nia kna’ar fatin, ohin.
Nia dehan, Governu la bandu ita-boot sira-nia direitu atu mete ba organizasaun hotu-hotu maibé Governu bandu bainhira traballadór sira loke fali fatin treinu iha Austrália no mós kria konflitu ba malu, se bainhira deteta sei deporta traballadór ne’ebé la kumpre regras.
“Imi mak kria fali problema iha ema-nia rain, ha’u sei fó kedas naran ba kompañia atu hasai imi no deporta imi fila mai Timor, maske imi-nia kontratu seidauk hotu,” nia dehan.
Nia esplika, tamba antes Governu haruka traballadór sira ba servisu iha rai-li’ur, sira mós halo juramentu atu kumpre regra no juramentu ne’ebé iha inklina mós bandu prátika arte marsiál.
Iha oportunidade ne’e, reprezentante traballadór timoroan, Norberto Asis da Costa Belo, hateten nia sei halo tuir apelu ne’e tanba loos duni asuntu arte marsiál ne’e define mós iha juramentu ne’ebé sira halo.
“Ha’u hatene katak ida-ne’e la’ós impede ami-nia direitu atu mete ba organizasaun, maibé evita ami atu prátika iha rai-li’ur tanba iha Austrália ne’e ema tau prioridade ba servisu la’ós insulta malu, ita mós tenke hanoin ita-nia família tanba sira iha Timor hein hela ita-nia apoiu,” nia dehan.
Entretantu, bazeia ba dokumentu juramentu ne’ebé Agencia Tatoli asesu asuntu proibi ba prátika arte marsiál ne’ebé define iha númeru lima (5) ko’alia kona-ba “Ha’u sei la lori ka halo treinu arte marisiál no rituáls saida de’it iha Timor-Leste ba Austrália iha programa PALM nia mahon, ida-ne’e kontra regulasaun SEFOPE no ha’u bele hetan sansaun bainhira envolve kle’an durante tuir programa mobilidade laborál nia laran”.
Jornalista : Alexandra da Costa
Editór : Cancio Ximenes
