DILI, 06 Outobru 2025 (TATOLI)—Governu liuhusi Sekretária Estadu Formasaun no Profisionál Empregu (SEFOPE) daudaun ne’e sei hein hela rezultadu outopsia husi ospitál Cabucha Brisbane kona-ba mate-isin traballadór Jonio da Costa, neʼebé foin lalais hakotu iis iha Austrália iha 24 Setembru 2025.
Notísia Relevante: SEFOPE koordena ho Adidu Austrália ba transferénsia mate-isin traballadór Jonio da Costa mai Timor
“Ami halo ona koordenasaun ho adidu Timor-Leste ba Austrália hodi halo transferénsia mate-isin ne’e mai Timor, maibé seidauk bele tanba rezultadu autopsia neʼebé seidauk fó sai. Hanesan ita hotu hatene, prosesu iha Austrália lahanesan iha ne’e, sira-nia ne’e kle’ur bele dura to’o lori fulan,” Sekretáriu Estadu Formasaun Profisionál no Empregu (SEFOPE), Rogério Araújo Mendonça, informa ba Agência Tatoli iha nia kna’ar fatin, Kaikoli, ohin.
Tanba ne’e, nia hateten, bainhira rezultadu fó sai ona no atu transferénsia mak sira sei atualiaza ba públiku, agora sira seidauk iha posibilidade tanba iha hela prosesu nia laran.
Antes ne’e, iha 25 Setembru 2025, Diretór Nasionál Empregu Estranjeiru iha Sekretária Estadu Formasaun no Profisionál Empregu (SEFOPE), Joao Correia Pereira, hateten sira simu ona informasaun katak traballadór timoroan ida ho naran Jonio da Costa hakotu iis iha Austrália no daudaun ne’e halo hela autopsia.
“Kona-ba rezultadu autopsia ne’e ita labele hatene bainhira mak hotu, tanba prosesa ne’e kle’ur uitoan. Maibé, ami mós koordena ona ho ita-nia Adidu iha Austrália para haree mekanizmu atu transfere mate-isin mai Timor,” nia dehan.
Jornalista : Alexandra da Costa
Editór : Cancio Ximenes
