DILI, 25 Setembru 2025 (TATOLI)—Diretór Nasionál Empregu Estranjeiru iha Sekretariu Estadu Formasaun Profisionál no Empregu (SEFOPE), João Correia Pereira, simu ona informasaun katak traballadór timoroan ida ho naran Jonio da Costa hakotu iis iha Austrália no daudaun ne’e halo hela autópsia.
“Kona-ba rezultadu autópsia ne’e ita labele hatene bainhira mak hotu, tamba prosesa ne’e kleur oituan. Maibé, ami mós koordena ona ho ita-nia Adidu iha Austrália para haree mekanizmu atu transfere mate-isin mai Timor,” Diretór informa ba Ajénsia TATOLI, via telefónika, Kinta ne’e.
Diretór dehan, matebian nia kolega konta antes ne’e Jonio da Costa sente isin moras bainhira fila husi serbisu, tamba ne’e nia konsumu ai-moruk hodi deskansa maibé bainhira nia kolega sira fanun, nia iis laiha ona.
“Depois loloos mak ita sei hatene hamutuk bainhira parte médika Austrália nian fó sai ona ninia rezultadu husi outópsia ne’e rasik hodi hatene kauza husi ninia mate ne’e,” nia akresenta.
Notísia relevante : Mate-isin traballadór José Rebelo to’o Timor-Leste iha semana ne’e
Iha sorin seluk, Traballadór iha Austrália, Salvador de Castro konta tuir, matebian fila husi serbisu iha loron Tersa (23/09) kontinua deskansa kedas iha apartamentu ne’ebé nia hela ba ho kolega na’in-10 (mesak traballadór timoroan).
“Kolega sira la hatene, hanoin katak nia kolen mak toba, nune’e sira mós la inkomoda nia. Maibé to’o fali daderrsan iha Kuarta (24/09) sira haree matebian ne’e nia karreta sei para hela iha fatin no sira hanoin nia kolen mak la bá serbisu, entaun sira kontinua bá serbisu,” nia katak.
Traballadór ne’e hatutan: “Maibé to’o fali sira sai serbisu matebian ne’e nafatin toba ne’e mak kolega ida ba fanun nia no haree ba nia oin, kaben mutin mak nakfurin nakonu, entaun iha momentu ne’e kedas sira kontaktu ho parte seguransa no traballadór sira seluk hodi halo atuasaun no hetan ai-moruk isin kolen iha meza leten.”
Daudaun ne’e mate-isin iha hela mortuáriu Cabucha iha Brisbane.
Iha sorin seluk, Traballadór timoroan iha Austrália no hanesan matebian nia família, Apolinário Mendonça hateten, Jonio da Costa hela iha área Melbourne no tuir informasaun nia serbisu kiu oras serbisu tanba ne’e deskansa menus.
“Matebian ne’e ami iha relasaun família, primu hela tamba ha’u-nia tiu hola sira-nia tia balun iha Aileu,” nia esplika.
Informasaun ne’e sira hetan hotu tamba sira mós kria grupu traballadór timoroan sira iha Austráli.
“Kolega sira haree nia toba la hadeer, entaun sira ba fanun maibé matebian iis laiha ona no sira kontaktu ba Polísia sira to’o horikalan, foti kedas mate-isin iha loron bá iha ospitál no daudaun ne’e kolega na’in-tolu mak hein hela iha mortuáriu,” tenik nia.
Jonio da Costa moris iha loron 18 Novembru 1996 husi munisípiu Aileu no nia bá serbisu iha Austrália iha tinan 2022.
Jornalista : Alexandra da Costa
Editora : Julia Chatarina
