BOBONARU, 08 Outubru 2025 (TATOLI)-Benefisiáriu sira iha aldeia Tunubibi, suku Tapo-Memu, postu administrativu Maliana, munisípiu Bobonaru, ezije ba empreza Rics Unipessoal Lda. atu aselera projetu konstrusaun Uma Dignu ba Povu, tanba implementasaun obra ne’e atraza liu.
Sira hato’o preokupasaun ne’e tanba besik ona tempu udan, maibé serbisu sei hakdasak.
Manuel Gouveia Leite, benefisiáriu uma númeru 25, triste tanba obra ne’e paradu dezde fulan-Agustu no to’o agora seidauk taka uma-kakuluk.
“Ha’u-nia uma fatin sobu tiha, tanba ne’e mak husu tenke lalais para iha Outubru ne’e tenke taka zinku para aban bainrua udan karik ha’u bele tama sementara toba iha laran, depois udan para oras ida rua ha’u bele mai fali uma aat ne’e. Karik la taka, entaun ha’u hela iha ne’ebé?”, nia lamenta.
Aleinde ne’e, Setelinda de Fátima, benefisiária uma numeru 24 reforsa katak udan foin lalais halo sira terus ho udan-been, tanba hela provizóriu iha lona okos no dapur.
“Ami-nia uma ne’e sobu dezde iha Janeiru, agora besi sa’e tiha mais seidauk book. Sira dehan halo fulan haat de’it, iha ne’ebé? Tama ona Outubru mós seidauk book, agora ha’u ho ha’u-nia oan sira araska, ami toba iha bee-laran de’it”, nia preokupa.
Koordenadór Ministériu Dezenvolvimentu Rurál no Abitasaun Komunitária (MDRHC, sigla portugés) Bobonaru, Manuel Ximenes da Costa, observa katak projetu ne’e la’o atraza tanba fulan hirak liubá klima la permite atu empreza mobiliza materiál lokál no fabrikadu bá fatin projetu.
Atu solusiona problema ne’ebé enfrenta iha terrenu maka MDRHC halo ona reuniaun ho empreza konstrutora ho komunidade, nune’e bele aselera serbisu. “Ministériu haka’as kompañia, ohin loron materiál tama ona. Batako, materiál sira kompletu ona, ita hein deizaun husi kompañia atu aselera serbisu”, dehan.
Enjeñeiru Rics Unipessoal Lda, Marcos Mau Laca, dehan progresu fíziku ba obra ne’e atinje ona 40%-resin.
Nia garante molok hakat ba tinan foun empreza sei entrega projetu ne’e ba Governu, tanba materiál lokál no fabrikadu daudaun ne’e stock nakonu iha kada fatin implementasaun projetu.
“Iha Outubru ne’e ami atu taka kalen ba uma lima ka neen, depois sira seluk ami kontinua. Ha’u fiar katak antes tama 2026 ne’e ami sei halo kompletu, entrega ba Governu hodi entrega fali ba ita-nia benefisiáriu sira”, dehan.
Nia deklara katak iha uma haat mak progresu serbisu la’o trade, tanba hetan impedimentu husi badaen lokál, maibé parte empreza nafatin koopera ho ekipa MDRHC Bobonaru hodi solusiona.
“Iha uma 25 antes ne’e badaen lokál sira mak kontrui hotu, maibé sira-nia ezijénsia barabarak, entaun sira abandona serbisu. Ami foti desizaun katak tenke foti ona serbisu sira ne’e hodi aselera serbisu atu alkansa alvu ne’ebé Governu hakarak. Ne’e mak uma 21 ami rezolve ona, iha uma 11 badaen sira husi Ermera ho Dili. Hela uma haat mak iha badaen lokál nia liman ne’ebé seidauk kontinua serbisu, maibé iha tempu badak ami sei prienxe hotu uma hirak ne’ebé la halo serbisu”, afirma.
Uma ne’ebé konstrui ho totál unidade 25 no obra ne’e gasta orsamentu hamutuk $798.762,62, ne’ebé tuir kontratu ramata iha loron 04/07/2025.
Notísia relevante: Benefisiáriu sira iha Tunubibi haksolok ho programa Uma Dignu ba Povu
Jornalista: Sergio da Cruz
Editora: Maria Auxiliadora
