DILI, 09 Outubru 2025 (TATOLI)–Ministériu Petróleu no Rekursu Minerál (MPRM) hamutuk ho Organizasaun Naun Governamentál (NGO) Core Group Transparency Timor-Leste (CGT-TL) realiza semináriu nasionál ho tema ‘Dezafiu no Sustentabilidade Fundu Petrolíferu no alternativa ba Estadu pós Bayu-Undan’.
“Objetivu husi semináriu ne’e mak atu promove reflesaun konjunta kona-ba polítika públika no dezafiu ne’ebé nasaun ne’e hasoru iha setór petrolíferu. Semináriu ida-ne’e maka atu kria oportunidade ida hodi fahe informasaun ho parte hotu kona-ba planu no polítika dezenvolvimentu setór petrolíferu nasaun nian,” Ministru Petróleu no Rekursu Minerál, Francisco da Costa Monteiro hateten iha Sentru Konvensionál Dili (CCD, sigla portugés), Kinta ne’e.
Aleinde ne’e, atu fahe hanoin kona-ba jestaun rekursu petrolíferu nasaun no hakarak hametin diálogu entre Governu no sosiedade sivíl hodi promove diskusaun aberta ida kona-ba polítika jestaun Fundu Petróleu, transparénsia iha setór posível ekonómiku ba país iha pós senáriu Bayu-Undan.
Notísia relevante : PN kontinua preokupa sustentabilidade fundu mina-rai
Semináriu ne’e sai hanesan fórum ida hodi halo analize ba medida sira ne’ebé maka ezekutivu implementa. Eventu ne’e reprezenta fórum ida ba debate kona-ba polítika no asaun sira ne’ebé Governu adota hodi garante jestaun sustentável ba Fundu Petrolíferu.
Ministru dehan, Governu rekoñese valór fahe informasaun no kooperasaun ho organizasaun sosiedade sivíl hodi konsidera esensiál atu haburas komprensaun mútua no hetan solusaun konjunta sira ne’ebé garante jestaun di’ak ba rekursu nasionál sira.
Iha biban hanensan, Koordenadór CGT-TL, Jami Carter esplika, semináriu ne’e halo parte iha misaun organizasaun atu promove transparénsia no akuntabilidade iha jestaun rekursu públiku no indústria estrativa sira.
“Transparénsia Grupu Núkleu hanesan plataforma nasionál ne’ebé kompostu husi organizasaun sosiedade sivíl hamutuk 16 ne’ebé nia misaun maka promove transparénsia, responsabilizasaun, no monitorizasaun ba Orsamentu Jerál Estadu no indústria estrativa sira iha Timor-Leste,” Carter hateten.
Sosiedade sivíl nu’udar parseiru estratéjiku Governu nian atu buka solusaun konjunta ba dezafiu oioin ne’ebé populasaun hasoru.
Jami Carter akresenta, bainhira trata kona-ba mina no gás hanesan rekursu esensiál sira ba kresimentu ekonómiku, esensiál atu garante jestaun sustentável ba ativu sira.
Nune’e, atividade ne’e ho objetivu atu hametin koñesimentu kona-ba futuru Fundu Petrolíferu ba alternativa no dezafiu sira ne’ebé mosu hodi bele kontribui ba dezenvolvimentu nasionál ne’ebé ekilibradu.
Eventu ne’e halibur estudante universitáriu, profesór, reprezentante sosiedade sivíl, autoridade lokál, no membru instituisaun sira ne’ebé tutela ba MPRM.
Jornalista : Arminda Fonseca
Editora : Julia Chatarina
