OEKUSI, 09 Outubru 2025 (TATOLI) – Organizasaun Naun Governamentál Internasionál (ONG) OXFAM iha Timor-Leste, sente triste tanba lakon líder dedikadu no parseiru forte ida, Diretór ONG Binibu Faef Nome (BIFANO), Jacinto Mala, ne’ebé fila hikas ona ba uma rohan-laek, ba hamutuk ho Aman Maromak iha Nia Kadunan Santu.
Notísia relevante:‘Konservadór bee-matan iha Oekusi’ lakon vida mistériu iha Nípani
OXFAM Timor-Leste, hatudu espresaun ho sentimentu triste tanba lakon líder dedikadu no parseiru forte ida ne’ebé serbisu hodi avansa justisa sosiál no ekonómika ba povu Timor-Leste, liuliu ba povu sira iha Rejiaun Administrativa Espesiál Oekusi Ambeno (RAEOA).
“OXFAM iha Timor-Leste hamutuk lutu ba señor Jacinto Mala, Diretór BIFANO ne’ebé fila hikas ona ba hamutuk ho Aman Maromak iha Nia Kadunan Santu. OXFAM sente triste tebes tanba lakon líder dedikadu no parseiru forte ida-ne’ebé servisu hodi avansa justisa sosiál no ekonómika ba povu Timor-Leste, liuliu povu Oekusi,” refere Komunikadu imprensa ne’ebé Ajénsia Tatoli,I.P asesu kinta ne’e, iha pájina ofisiál OXFAM Timor-Leste.
Iha komunikadu ne’e sita katak, Maun Jacinto, nia kompromisu ne’ebé la kolen atu hakbiit komunidade rurál sira no promove dezenvolvimentu inkluzivu husik hela legadu ida-ne’ebé lori impaktu bo’ot tebes no sei inspira nafatin ita hotu.
“Ami-nia sentidu kondolénsia ba nia família, kolega sira, no belun hotu iha BIFANO durante tempu susar ida-ne’e, atu nia klamar deskansa iha dame, no atu nia vizaun moris nafatin liuhusi serbisu ne’ebé nia estabelese – Deskansa ho dame, Maun Jacinto Mala, BIFANO iha memória,” hakotu.
Batista Sombai Caunan, nu’udar família matebian, sente triste tanba mate ho misteru iha ámbitu seremónia kulturál família nian.
“Ami família tomak sedauk prontu aatu simu realidade ne’e, maibé Maromak mak deside, boa-viajén maun,” nia hateten.
Notísia relevante:BIFANO konsege konserva bee-matan 13 iha Oé-Cusse
Entretantu, Diretór Organizasaun Naun Governamentál (ONG) Binibu Faef Nome (BIFANO), Jacinto Mala, lakon vida misteriozamente ho idade 50 iha loron segunda kalan 06 Outubru 2026 hafoin asiste hela seremónia kalan kulturál, atu prepara ba nia família ida atu prepara ba kazamentu iha aldeia Sakato suku Nípani sub-rejiaun Peante Makasar Rejiaun Administrativa Espesiál Oekusi Ambeno (RAEOA).
Matebian Jacinto Mala, moris iha aldeia Pune, suku Usitasa’e sub-rejiaun Oésilo, iha loron 15 Agostu 1975, no hakotu iis iha loron 06 Outubru 2025, maizumenus tuku 11 ho balun hodi husik hela nia feen-kaben Anita da Conçeição ho oan na’in-neen – feto lima mane ida, daudaun ne’e eskola hela iha eskola KAFE Oekusi.
Notísia relevante:BIFANO identifika kauza dezastre naturál iha Oé-Cusse tanba falta konsiénsia umanu
Jornalista: Abílio Elo Nini
Editór: Rafael Ximenes de A. Belo
