BOBONARU, 09 Outubru 2025 (TATOLI) – Xefe suku Ritabou, Postu Administrativu Maliana, Munisípiu Bobonaru, Maximiano dos Santos Araujo, husu ba Kompaña Biabasan Mogen Unip Lda atu aselera implementasaun projetu Konstrusaun Irrigasaun Genumatan molok udan monu rai.
Maximiano haktuir iha loron 04/10/2025 liubá nia parte tun direita ba terrenu halo observasaun katak projetu la’o hela, maibé presiza aselera tanba tempu udan difikulta tebes transporte atu mobiliza materiál lokál no fabrikadu ba fatin projetu.
“Projetu agora la’o, ninia bee-dalan sira besik atu hotu ona, hela de’it metru 80 atu konklui, maibé Intek ne’e seidauk sór. Depois iha intek nia sorin mai iha metru 72 rai seidauk dudu-sai. Seidauk sór sei tomak hela, tanba ne’e hau husu para aselera. Se irrigasaun ne’e sei la hotu iha tinan ne’e kuandu rai-udan ona, tanba udan ona karreta labele tama iha ne’ebá – se tama nia hela kedas iha ne’ebá,” nia informa ba Jornalista sira, iha sede suku Ritabou, kinta ne’e.
Líder Komunitária ne’e mós husu kompaña atu ezekuta obra ne’e ho di’ak no uza materiál ne’ebé kualidade,tanba liuhusi observasaun loron hirak liubá nota katak materiál lokál balun ne’ebé kompaña uza la tuir kontratu.
“Ha’u preukupa mak rai-henek ne’e,tanba rai-henek ne’e ha’u haree la tuir ida. Governu kontratu ho kompaña ne’e rai-henek Soso, tanba ne’e ha’u hateten badaen sira labele uza rai-henek ne’e lai. Ha’u liga ba tékniku PDIM sira ba haree katak rai-henek ne’e labele uza tanba la kualidade, ne’e mak orienta fali ba kompaña tenke ra’ut rai-henek iha Beadila Kailaku ne’e mak kualidade di’ak,” nia haktuir.
Enjeñeiru Kompaña Biabasan Mogen Unip Lda, Janio Olivio de Jesus Barreto, konfirma, progresu fizíku atuál ba implementasaun obra ne’e atinje ona 66% no kontrusaun bee-dalan falta deit ona metru 300 resin husi totál metru 1000 resin.
“Ami-nia servisu agora la’o normál hela,antes ne’e la’o tarde duni,tanba tuir loloos projetu ne’e implementa iha fulan-abríl maibé implementasaun projetu hahú fali iha fulan-jullu nia laran mas ami fiar katak sei finaliza tuir kontratu,” Janio garante.
Obra ne’e konstrui ho orsamentu Planu Dezembolvimentu Integradu Munisipál (PDIM) tinan-2025 ho valór kontratu $229,429.35 hahú iha fulan-Abríl no ramata iha fulan-setembru 2025 liubá, maibé la konsege no hetan extensaun ba fulan rua tan.
Enkuantu Autoridade Munisípiu Bobonaru deside kontrui irrigasaun ne’e atu fasilita agrikultór sira hasa’e produsaun hare hodi responde ba nesesidade doméstika Munisípiu Bobonaru nia no irrigasaun ne’e sei fornese bee ba natar pur-volta ektar 400-resin.
Notisía relevante: https://tatoli.tl/2025/09/05/projetu-irrigasaun-genumatan-seidauk-hatudu-progresu/
Jornalista: Sergio da Cruz
Editór: Rafael Ximenes de A. Belo
