OEKUSI, 14 Outubru 2025 (TATOLI) – Prezidente Autoridade Autoridade Rejiaun Administrativa Espesiál Oekusi Ambeno (RAEOA), Régio da Cruz Salu, hasai despaixu ofisiál ida númeru 01/X/2025/PA/RAEOA-TL ho asuntu nomeasaun ba kargu xefia no departamentu sira inklui mantein kargu jestór sub-rejiaun haat, Oésilo Pante Makasar, Passabe no Nítibe.
Notísia relevante:Jestór Pante Makasar–Oésilo lamenta tanba ezoneradu hosi Autoridade RAEOA
Ho despaixu ofisiál ne’e, Prezidente Autoridade, Régio da Cruz Salu, esplika katak durante mandatu fulan tolu, nia laiha ejizénsia ida atu hapara jestór sira ne’ebé eziste antes ona, maibé presiza serbisu hamutuk atu aselera funsionamentu administrasaun Oekusi to’o 31 Dezembru 2025.
“Ha’u deklara iha ne’e, Prezidente Autoridade laiha ejizénsia atu hapara lalais jestór postu administrativu sira. Ha’u ko’alia ona ho sira dezde loron 09 Setembru katak imi nafatin mantein maibé fallansu husi gabinete mak la konsege hato’o karta despaixu ba sira ho lalais, ha’u tenke sira tanba ha’u iha ne’e ejiste iha líder sira no jestór sub-rejiaun sira-ne’e, laiha ejizénsia ida atu bele hasai sira iha périodu reajustamentu ne’e,” nia hateten iha Oekusi, ohin.
Notísia relevante:Rejeita desizaun atu ezonera kargu jestór sub-rejionál sira iha RAEOA
Nia informa, iha loron 01 Outubru 2025, nu’udar Prezidente Autoridade fó sai despaixu ida atu mantein jestór sira-ne’e, no iha iha Setembru mós iha diskusaun ida mai to’o Prezidente Autoridade atu-bele halo reajustamentu atu re-koloka fali kargu xefia sira administradór postu sira tama iha funsaun públika balun.
“Ita-nia administradór sira balun la’ós funsionáriu públiku, maibé líder sira-ne’e, eziste nanis ona, antes ami mai. Ne’ebé, ami hakarak serbisu lai ho líder sira-ne’e, laiha ejizénsia ida atu hapara, maibé ha’u la fó sala diretór sira, tanba bainhira ami hahú, ami fó kompeténsia konfiansa morál ba sira atu aselera serbisu, tanba primeiru ita tenke aselera mós reajustamentu serbisu institusionál administrasaun públika estruturál no funsionál iha Oekusi,” nia hateten.
Tanba ne’e, atu asegura nafatin funsionamentu administrasaun la’o ho transparánsia no rápidu, Prezidente Autoridade uza nia kompeténsia, halo tranferénsia urjentemente ba Xefe Gabinete Prezidente Autoridade RAEOA.
“Ha’u konsiente, ohin mós ha’u halo desizaun ida, ha’u penaliza ha’u-nia xefe Gabinete tanba trata despaixu atu mantein jestór na’in-rua ne’e dezde loron 01 Outubru 2025 karta ne’e seidauk to’o jestór rua ne’e nia liman, entaun ha’u halo penaliza hodi muda tiha nia ba fatin seluk, tanba Gabinete Prezidente ne’e tenke serbisu lais, ha’u hanoin jestór na’in-rua atu ezonera ne’e sira la sala, tanba seidauk hetan ha’u-nia dexpaisu atu mantein sira nafatin,” nia klarifika.
Notísia relevante:PM Xanana atribui prioridade neen ba PA RAEOA ezekuta durante fulan tolu
Entretantu, jestór sub-rejiaun haat ne’ebé antes ne’e simu ona tomda pose husi Prezidente Autotridade Sesante, Rogério Tiago Lobato 2024 mak hanesan, Loréncio da Cunha nu’udar jestór sub-rejiaun Pante Makasar, Benedito Ulan n’udar Jestór sub-rejiaun Oésilo, Paulino Marques nu’udar jestór sub-rejiaun Pássabe no Agustinho Afulit nu’udar jestór sub-rejiaun Nítibe.
Jornalista: Abílio Elo Nini
Editór: Rafael Ximenes de A. Belo
