OEKUSI, 10 Outubru 2025 (TATOLI) – Jestór sub-rejiaun Pante Makasar, Lorêncio da Cunha ho Jestór sub-rejiaun Oésilo, Benedito Ulan, lamenta ho desizaun husi Rejiaun Administrativa Espesiál Oekusi Ambeno (RAEOA), ne’ebé hasai karta ofisiál ida hodi ezonera sira husi kargu jestór sub-rejionál.
Notísia relevante:PM Xanana atribui prioridade neen ba PA RAEOA ezekuta durante fulan tolu
Jestór sub-rejiaun Pante Makasar, Lorêncio da Cunha, informa katak, ezonerasaun la ho karta ezonerasaun maibé hasai de’it sirkulár kona-ba destakamentu funsionáriu no troka mós ho jestór sira.
Tanba ne’e, nia lamenta, tanba antes ne’e simu tomada pose hodi asumi kargu nu’udar jestór sub-rejiaun Pante Makasar, tuir loloos atu hasai ema tenke ho karta ofisiál ida nu’udar baze legál.
“Karta ne’e transferénsia destakamentu de’it, hasai husi Diretór Administrasaun, to’o agora ami seidauk hetan karta ezonerasaun depois despaisu kona-ba hapara ami nu’udar jestór sub-rejiaun mós laiha, maibé Diretór haruka de’it, dehan tama ona ba Outubru, jestór foun sira tama ona serbisu, sira tuan muda emerjénsia hotu ba diresaun atu apoia serbisu. Ha’u rekoñese polítika mak hanesan ne’e, maibé triste troka ami na’in-rua de’it, Pássabe ho Nítibe sira mantein,” nia dehan ba jornalista sira iha Oekusi, ohin.
Notísia relevante:Rogério Lobato husu komunidade apoia jestór foun dezenvolve sub-rejionál Oésilo
Lamentasaun ne’e, hato’o mós husi Jestór sub-rejiaun Oésilo, Benedito Ulan, katak, karta despaisu husi Prezidente Autoridade fó sai, laiha mudansa ba kargu jestór sira, maibé to’o Diresaun Rejionál Administrasaun, mak hasai karta hodi halo mudansa.
“Tanba ne’e, triste tebes ho autoridade agora ne’e. Ha’u hetan despaisu husi Prezidente Autoridade, ha’u kaer hela, katak ha’u mantein nafatin nu’udar jestór Oésilo, maibé mai to’o Diretór Administrasaun la tuir despaixu ne’e ona. Sira troka ha’u tau fali ema seluk, karta dirije mai ha’u atu muda emerjénsia ba diresaun administrasaun, agora ha’u kaer hela despaixu Prezidente Autoridade nian, katak ha’u tenke mantein,”nia lamenta.
Notísia relevante:PA RAEOA husu jestór Pante Makasar ukun ho fuan no hakuak partidu hotu
Hatan ba preokupasaun ne’e, Diretór Diresaun Rejionál Administrasaun, José Tanesib Anunu, klarifika katak, antes ne’e, Primeiru-Ministru hasai rezolusaun Governu númeru 36/2025, loron 28 fulan-Agostu, kona-ba ezonerasaun estrutura tuan, rezolusaun númeru 37/2025, loron 28 fulan-Agostu, kona-ba nomeasaun estrutura foun, rezolusaun númeru 38/2025, loron 28 fulan-Agostu, kona-ba prosede extinsaun Koordenadór-ZEEDOA, ba kargu xefia sira-ne’ebé la temi iha rezolusaun iha leten, Prezidente Autoridade sei nomeia pontu fokál ba serbisu idak-idak.
Nune’e iha loron 02 Setembru 2025 Prezidente Autoridade RAEOA hasai tan karta sirkulár ida ho númeru reff, 02/GAB/PA/RAEOA-TL/IX/2025, ho asuntu atu hakotu (cessasaun) ba kargu xefia sira, hanesan xefe departementu diretór rejionál husi estrutura sesante nian.
“Ne’e la eziste ona inklui jestór sub-rejiaun sira. Entaun, husi ne’e, jestór sira hala’o serbisu hanesan vocal point (pontu vokál) de’it, labele asina dokumentu ruma, tanba seidauk aprova lei organograma ho funsionáriu sira-ne’ebé destakadu iha postu ida-idak, entaun sira (jestór) hala’o kna’ar ne’e, hanesan responsavél de’it. Ami hasai sira la presiza karta ezonerasaun, tanba sirkulár ezonerasaun ne’e hasai ona husi Prezidente Autoridade iha loron 02 Setembru 2025,” nia dehan.
Autoridade ne’e esplika, nu’udar funsionáriu públiku, asumi kargu másimu tinan rua de’it, depois nomeia fali ema foun, bele mantein no bele halo mudansa.
“Ida-ne’e mós hanesan, ita halo avaliasaun ba sira-nia serbisu, sira bele mantein no bele tau ema seluk, ba kargu xefia sira, ita seidauk aprova, entaun ita destaka de’it ema sira-ne’ebé mak atu sai vocal point iha jestór sira-nia fatin, hodi hein aprovasaun organograma foun ne’e, tanba provasaun ne’e mós sei públika ofisiál iha Jornál Repúblika,” nia hateten.
Notísia relevante:Rejeita desizaun atu ezonera kargu jestór sub-rejionál sira iha RAEOA
Entretantu, karta despaixu ofisiál ne’ebé Ajénsia Tatoli,I.P asesu, husi Diresaun Rejionál Administrasaun, ho númeru 27RAEOA/DRA/X/2025, ne’ebé asina husi Diresaun Rejionál Administrasaun, José Tanesib Anunu ho Diretór Jerál Komisaun Funsaun Públika RAEOA, Domingos Punef.
Asuntu: Destakamentu no Transferénsia Funsionáriu Públiku DRA. Iha despaixu ne’e, sita lei númeru 18/2023, loron 30 fulan-Novembru, alterasaun datoluk ba lei númeru 2/2014, loron 18 Juñu kria RAEOA. Haree tuir lei númeru 93/2022, loron 22 fulan Dezembru, alterasaun daruak ba dekretu-lei númeru, 5/2015, loron 22 fulan-Janeiru kona-ba estatutu RAEOA. Nune’e mós tuir rezolusaun Guverno númeru 37/2025, loron 28 fulan Agustu, kona-ba nomeasaun ba Prezidente, ZEEDOA no membru Autoridade RAEOA.
“Relasiona ho asuntu iha leten, Diretór Rejionál Administrasaun RAEOA, hakarak hato’o ba Ex. Diretór no Diretora rejionál sira no mós Aministradór Postu Administrativu sira, kona-bá Destakamentu Funsionáriu husi Diresaun Rejionál Administrasaun, tuir profesionál no tarefa serbisu ne’ebé sira iha, atu aplika iha terenu, hodi apoia serbisu iha diresaun no mós Postu Administrativu sira, inklui suku relasiona ho polítika Desentralizasaun Administrativa no Podér Lokál iha RAEOA,” sita iha dokumentu ne’e.
Notísia relevante:Autoridade RAEOA hasai sirkular ezonera kargu xefia sira
Jornalista: Abílio Elo Nini
Editór: Rafael Ximenes de A. Belo
