ERMERA, 15 Outubru 2025 (TATOLI)—Sekretária Estadu Egualdade, Elvina Sousa Carvalho, informa Ministériu Agrikultura, Pekuária, Peska no Floresta (MAPPF) tenke tau-atensaun ba ai-taun ne’ebé fó kór ba tais tanba ai ne’e hahú lakon ona.
“Oras ne’e Sekretaria Estadu Arte no Kultura halo hela esforsu másimu ho Ministériu Agrikultura, Pekuária, Peska no Floresta (MAPPF) oinsá bele prezerva ai-taun sira-ne’ebé fó kór naturál ba tais sira no mós kabas ne’ebé agora menus ba daudaun,” Sousa hatutan ba jornalista sira iha Suku Leimea Kraik, Postu Administrativu Hatolia A, Munisípiu Ermera, Kuarta ne’e.
Nia hatutan liña ministeriál sira halo hela esforsu no SEI nia parte nafatin halo advokasia liuliu kona-ba prezervasaun tais tanba tais nu’udár identidade Kultura Timor-Leste nian ne’ebé tenke halo esforsu lubuk ida hodi la’o hela ba rede soru-na’in oinsá atu prezerva no promove.
Sekretaria Estadu hateten oras ne’e Governu hamutuk ho parseru sira kontinua halo esforsu oinsá prezerva no promove tais.
Nune’e mós, Prezidente Komisaun F iha Parlamentu Nasionál, Maria Gurumali Barreto, informa feto sira iha kapasidade atu soru tais maibé difikuldade ba sira atu soru tais orijinál loloos ne’e tenke maihusi kabas.
“Atu halo tais ne’ebé orijinál loloos tenke maihusi kabas metan ne’e. Agora ida-ne’e mak difikuldade no ami levanta ona iha Parlamentu Nasionál para oinsá mak Ministériu Agrikultura la’ós haree de’it ba ortikultura sira maibé fó oportunidade ba agrikultura sira komesa kuda kabas ida-ne’e,” deputada hateten.
Aleinde ne’e, Sekretáriu Estadu Arte no Kultura, Jorge Soares Cristivão, hateten Sekretaria Estadu Arte no Kultura halo esforsu atu kontinua prezerva identidade ida-ne’e.
“Timor nia tais ne’ebé husik hela eransa husi beiala sira ita tenke esforsu apoiu husi entidade tomak no nafatin servisu hamutuk ho grupu sira atu halo promosaun tantu iha nivel nasionál no nivel internasionál,” nia dehan.
Jornalista: Osória Marques
Editór: Xisto Freitas da Piedade
