DILI, 15 Outubru 2025 (TATOLI)—Governu, kuarta ne’e, liuhusi reuniaun Konsellu Ministru estraordinária aprova projetu rezolusaun ne’ebé aprezenta husi Ministru Negósiu Estranjeiru no Kooperasaun, Bendito dos Santos Freitas no Vise-Ministra ba Asuntus ASEAN, Milena Maria da Costa Rangel, kona-ba kritériu dezignasaun no garantia kontinuidade pontu fokál Timor-Leste nian ba ASEAN.
Vise-Ministra ba Asuntus ASEAN, Milena Maria da Costa Rangel, hateten Timor-Leste aprezenta rezolusaun ida kona-ba kontinuidade saida mak Timor-Leste sei halo bainhira sai ona membru ASEAN nian.
“Tanba iha ASEAN define setór temátiku lubuk ida iha laran no ita hakarak asegura mantein partisipasaun ofisiál sira no bele ajuda memória institusionál no mós kontinuidade ba traballu,” Ministra informa ba jornalista sira iha Palásiu Governu, ohin.
Bazeia ba dokumentus ofisiál ne’ebé Ajénsia Tatoli asesu, katak rezolusaun Governu ne’e estabelese kritériu ba dezignasaun no substituisaun pontu fokál ne’ebé responsável ba koordenasaun téknika no institusionál entre Ministériu no Sekretariadu Nasionál ASEAN nian, hodi garante estabilidade, koerénsia no kontinuidade reprezentasaun téknika Timor-Leste nian iha prosesu adezaun no integrasaun plena ba organizasaun rejionál ne’e iha futuru.
Aleinde ne’e, rezolusaun ne’e mós prevee katak Ministériu no entidade públika ida-idak dezigna pontu fokál prinsipál ida, ne’ebé responsavel atu reprezenta Timor-Leste iha sorumutu sira funsionáriu importante nian, no pontu fokál suplente na’in-rua ne’ebé responsável ba partisipasaun iha grupu traballu no sorumutu tékniku sira, ne’ebé bele mós substitui pontu fokál prinsipál ne’e bainhira presiza.
Nune’e, define mós kritériu selesaun neʼebé klaru bazeia ba autoridade institusionál, kompeténsia téknika, profisiénsia linguístika, kapasidade koordenasaun no kompromisu hodi defende interese nasionál.
Ministériu Negósius Estranjeiru no Kooperasaun liuhusi Vise-Ministra ba Asuntus ASEAN, sei koordena prosesu atualizasaun, komunikasaun no akompañamentu ba pontu fokál ho Diresaun-Jerál ASEAN no instánsia rejionál kompetente sira.
Rezolusaun ne’e reafirma importánsia husi kontinuidade no estabilidade iha reprezentasaun Timor-Leste nian, ne’ebé esensiál hodi kumpre kompromisu sira-ne’ebé asume ona iha ámbitu Roteiru ba Adezaun Plena no partisipasaun nasionál iha pilár tolu ASEAN nian polítiku-seguransa, ekonómiku no sosiokulturál.
Jornalista : Alexandra da Costa
Editór : Cancio Ximenes
