VIKEKE, 17 Outubru 2025 (TATOLI)—Prezidente Autoridade Munisipál Vikeke (PAM), Francisco C. S de Gonzaga Soares, dezafia kargu xefia ba servisu munisipál sira kria planu ba dezenvolvimentu iha Munisípiu Vikeke.
“Diretór sira tenke hatene idak-idak nian uma laran. Labele loron mak halerik ba dezafiu barak. Diretór sira tau dezafiu ha’u mak sai preokupa. Ha’u preokupa tanba halo uma-oan ida mós helerik. Orsamentu iha ona diresaun sira. Ita-boot sira mak halo planu, la’ós ami mak halo fali planu. Diretór sira tenke hanoin halo planu no halo programa,” Francisco hateten iha aprezentasaun semináriu munisipál ho tema ‘dalan ba podér lokál’, iha salaun Administrasaun Vikeke, Sesta ne’e.
Tan ne’e, nia dehan, buat hotu ema seluk mak halo no prepara, oinsá ko’alia kona-ba podér lokál no desentralizasaun. Tanba ne’e, ba diretór sira labele halerik ba buat dezafiu sira-ne’ebé enfretadu, maibé esforsu hasoru dezafiu sira.
“Se ita mak halerik hela de’it, depoiz ita husu podér ba ami. Ida-ne’e mak sai problema. Tan ne’e, liuhusi oportunidade ne’e ha’u fó-hanoin katak pozisaun sira-ne’ebé entrega ba ita, favór ida ita ezekuta ho di’ak. Nune’e, ba diresaun sira labele halo monitoriza de’it. Se monitoriza de’it di’akliu ita tau xefe departamentu, lalika tau diretór,” nia realsa.
Tuir nia, diresaun sira iha Munisípiu Vikeke orsamentu alokada hotu, diretór sira mak kria planu ida-ne’ebé razoavel uitoan.
“Ida-ne’e ita fó-hanoin ba malu, importante ita hatudu katak ita mós bele,” nia hato’o.
Entretantu, Servisu Diresaun Munisipál hamutuk 19 no departamentu hamutuk 32 ne’ebé daudaun ne’e iha Munisípiu Vikeke.
Iha semináriu dalan ba podér lokál ne’e kada diresaun sira aprezenta sira-nia dezafiu no oportunidade sira iha Munisípiu Vikeke no hetan partisipasaun husi xefe suku no funsionáriu sira iha Munisípiu Vikeke.
Jornalista: Vitorino Lopes da Costa
Editór: Xisto Freitas da Piedade
