DILI, 21 Outubru 2025 (TATOLI) – Sanae Takaichi, Prezidente Partidu Liberál Demokrátiku (LDP), eleita nu’udar primeira-ministra Japaun nian iha votasaun iha Kámara Baixa iha loron-tersa (21/10), halo nia sai hanesan feto dahuluk ne’ebé lidera Japaun.
Sanae hetan apoia hosi LDP nia parseiru koligasaun foun, Partidu Inovasaun Japaun (JIP), iha dinámika polítika ne’ebé evolui ho kbiit polítika multi-partidária ne’ebé buras.
Maske aliansa entre LDP no JIP seidauk hetan maioria iha Kámara Baixa, eleisaun Takaichi nian hanesan substitutu Shigeru Ishiba nian kuaze serteza, tanba opozisaun la konsege nomeia kandidatu konjuntu ida.
Nune’e, Dieta Japonés hili ona primeira-ministra nasaun nian maka Takaichi Sanae tanba manán votasaun iha loron-tersa ne’e. Takaichi lidera Partidu Demokrátiku Liberál ne’ebé maka iha podér no sei lansa Governu koligasaun foun ida ho Partidu Inovasaun Japaun nian.
Takaichi sei simu pose hafoin Imperadór nomeia nia iha loron-tersa kalan. Ida-ne’e kompletu ona, nia hein atu hala’o konferénsia imprensa ida, ne’ebé sei sai hanesan nia dahuluk nu’udar primeira-ministra, Nippon Hoso Kyokai (NHK) no Kyodo Nwes, fó-sai iha tersa ne’e.
Líder Partidu Demokrátiku Liberál ne’ebé maka iha podér manán iha kámara Alta no Kámara Inferiór. Takaichi hetan nia maioria ho apoia hosi parseiru koligasaun foun LDP nian, Partidu Inovasaun Japaun nian no deputadu sira seluk.
Nia sei lansa nia governu koligasaun foun iha tempu badak no nia prepara hela atu nomeia deputadu sira-ne’ebé kompete hasoru nia iha korrida lideransa LDP nian nu’udar ministru.
Tuir informasaun, Takaichi mós planeia atu nomeia deputadu LDP nian, Kimi Onoda, nu’udar ministru seguransa ekonómika, no Ryosei Akazawa, xefe negosiadór tarifáriu Japaun nian ho Estadu Unida, nu’udar ministru komérsiu, hodi garante kontinuidade iha konversasaun bilaterál sira.
Nune’e mós Takaichi planeia atu oferese pozisaun xave sira ba nia rivál na’in-haat iha eleisaun lideransa LDP nian iha Outubru, iha esforsu ida atu hametin unidade partidu nian liuhosi nia gabinete foun.
Ho apoiu hosi deputadu independente na’in-haat iha Kámara Baixa, polítiku konservadór ho tinan 64 hein atu manán primeira volta hosi eleisaun, ne’ebé eziji kandidatu ida manán liu metade hosi votu sira hodi evita eleisaun ida.
Nein LDP ka JIP koñesidu mós hanesan Nippon Ishin iha maioria iha Kámara Alta, nune’e Takaichi, koñesidu ho nia postura forte iha defeza maibé polítika fiskál moderadu, tenke buka ho kuidadu apoiu hosi partidu opozisaun sira seluk hodi aprova nia proposta lei sira.
Molok votasaun parlamentár, ne’ebé akontese iha loron dahuluk hosi sesaun estraordináriu loron 58 nian ne’ebé remata iha loron 17 fulan-dezembru, gabinete Ishiba nian – ne’ebé forma iha fulan-Outubru tinan 2024 maibé sai fraku tanba la konsege mantein maioria iha kámara rua ne’e – rezigna-an ho massa.
Eleisaun primeiru ministru akontese hafoin Takaichi, eis-ministru asuntu internu, manán eleisaun lideransa LDP nian iha loron 4 fulan-Outubru.
Vitória ne’e mosu hafoin saída hosi parseiru koligasaun LDP nian ne’ebé kleur ona, Partidu moderadu Komeito, ne’ebé hakotu sira-nia parseria durante tinan 26 no dudu LDP atu buka aliadu foun sira.
Partidu Demokrátiku Liberál (LDP) no Partidu Japaun-Pasífiku (JIP), ne’ebé lidera hosi governante Osaka nian, Hirofumi Yoshimura, konkorda ona iha loron-segunda ne’e hodi harii koligasaun ida no kompromete apoia Takaichi iha eleisaun primeiru-ministru nian.
Maibé, JIP ladún provável atu kaer kadeira iha gabinete no sei serve de’it hanesan asesór ba primeiru-ministru.
Iha prosesu selesaun ba primeiru-ministru, uma rua hosi parlamentu japunés (Dieta) hala’o votasaun ketak.
Se laiha kandidatu ida maka manán maioria iha primeira volta, kandidatu rua ne’ebé hetan votu aas liu sei avansa ba segunda volta, no kandidatu ne’ebé hetan apoiu barak liu maka eleitu. Desizaun hosi Kámara Baixa maka iha presedénsia.
Tuir informasaun, Takaichi planeia atu nomeia Shinjiro Koizumi nu’udar ministru Defeza, enkuantu hein katak Toshimitsu Motegi sei asume kargu nu’udar ministru Negósiu Estranjeiru. Sira na’in-rua maka Takaichi nia rivál sira iha eleisaun lideransa LDP nian.
Naran rua seluk maka Sekretáriu Xefe Gabinete nian Yoshimasa Hayashi, ne’ebé maka ema ko’alia katak sei hetan nomeasaun nu’udar ministru ba asuntu internu no komunikasaun sira, no Takayuki Kobayashi, ne’ebé maka serbisu ona nu’udar xefe polítika LDP nian.
Hitoshi Kikawada, eis-vise-ministru seniór ida hosi Gabinete Gabinete nian no asosiadu besik ida hosi Takaichi, no Jiro Akama, eis-vise-ministru seniór ida hosi Ministériu Asuntu Internu sira, mós temi hanesan kandidatu forte sira hodi tama iha nia gabinete foun.
TATOLI
