VIKEKE, 22 Outubru 2025 (TATOLI)—Xefe Suku Uaimori, Postu Administrativu Vikeke Vila, Munisípiu Vikeke, Francelino António Gomes, hateten menus pesoál saúde iha Postu Saúde Uaimori menus tebes hodi difikulta atendimentu komunidade.
“Dezafiu ne’ebé ami-nia suku enfrenta mak menus pesoál saúde ne’ebé destaka iha ami-nia postu. Dezafiu ida-ne’e ami hato’o beibeik ba ministériu relevante maibé laiha resposta,” Francelino ba TATOLI iha Postu Vikeke Vila, Kuarta ne’e.
Autoridade Suku Uaimori ne’e hatutan, polítika Ministériu Saúde (MS) katak kada postu saúde ema na’in-hitu, maibé agora daudaun iha Postu Saúde Uaimori pesoál saúde ema na’in-rua de’it.
“Bainhira atividade ruma iha postu no munisípiu, pesoál sira bá tiha partisipa, entaun postu saúde taka,” nia hato’o.
Hatán ba preokupasaun ne’e, Diretór Servisu Saúde Munisípiu Vikeke (SSMV), Aljaksono S. Maia haktuir Planu Estratéjiku Dezenvolvimentu Nasionál (PEDN) 2011-2030 husi Ministériu Saúde (MS), kada postu mínimu ema tenke na’in-6 kompostu husi médiku ida, enfermeiru ida, parteira ida, tékniku aliadu ida, saúde públika ida no farmásia.
“Tan ne’e, ha’u hanoin PEDN iha ona, ita la’o neineik sei kobre hotu postu saúde sira iha Munisípiu Vikeke,” nia subliña.
Tuir dadus, rekursu pesoál saúde atuál iha Munisípiu Vikeke ho totál hamutuk na’in-418, kompostu husi médiku jerál na’in-43, enfermajen na’in-133, asistente na’in-17, parteira na’in-60, analista na’in-neen (6), farmasista na’in-26, médiku dentária na’in-ida (1), enfermeiru dentária na’in-hitu (7), téknika dentária na’in-tolu (3), tékniku matan na’in-ida (1), radiolojia na’in-ida (1), nutrisaun na’in-ualu (8), saúde mentál na’in rua (2), médiku record na’in-rua (2), saúde públika na’in-13.
Enkuantu, administrasaun kompostu husi finansa na’in-haat (4), administrasaun na’in-26, planeamentu na’in-ida (1), lojístika na’in-tolu (3), motorista na’in-14, seguransa na’in-17 no jardineiru na’in-30.
Jornalista: Vitorino Lopes da Costa
Editér: Xisto Freitas da Piedade
