DILI, 22 Outubru 2025 (TATOLI)-Deputada husi Partidu Kongresu Nasionál Rekonstrusaun Timorense (CNRT), Aliança da Conceição Araújo, solisita ba Fundu Dezenvolvimentu Kapitál Umanu (FDCH, sigla portugés) atu fó bolsa estudu ba timoroan sira hodi responde ba merkadu traballu iha país.
Deputada hato’o kestaun ne’e iha ámbitu audiénsia públika ho Ministériu Planeamentu no Investimentu Estratéjiku (MPIE) no instituisaun tutela iha Parlamentu Nasionál, ohin.
Tuir nia, nesesita duni disponibiliza bolsa estudu ne’ebé aliña ho área estratéjika ho prioridade nasionál no merkadu traballu iha país.
Nune’e mós, deputadu husi Partidu Demokrátiku (PD), Mariano Malik, dehan presiza iha kritéria ida rigoroza ba timoroan hotu atu asesu ba bolsa estudu, tanba tuir informasaun, bolseiru barak benefísia tiha programa maibé hala’o estudu la hotu no bá tiha fatin seluk, nune’e presiza iha sansaun forte.
Ministru Planeamentu no Investimentu Estratéjiku, Gastão de Sousa, hateten dezde 2011 bolseiru 12.131 mak sai ona benefisiáriu. Husi ne’e 6.274 gradua ona, 4.482 ativu, 1.366 kansela no ualu lakon vida.
Governante ne’e aprezenta mós proposta OJE 2026 husi FDCH ne’ebé prevee $20,615,860 hodi aloka ba saláriu no vensimentu $1,306,236, bens no serbisu $1,257,902, transferénsia públika $18,321,722.
Nia relata mós ezekusaun OJE 2025 husi FDCH atinje ona 66% husi montante inisiál $18,963,544.
Notísia relevante: FDCH hasai ona bolsa estudu 6.347 husi diploma 1 to’o doutoramentu
Jornalista: Nelson de Sousa
Editora: Maria Auxiliadora
