DILI, 14 Outubru 2025 (TATOLI)—Sekretáriu Estadu Asuntu Toponímia no Organizasaun Urbana, Germano Santa Brites ho nia ekipa konjunta, Tersa ne’e, halo sensibilizasaun Dekretu-lei númeru 3/2024 kona-ba ijiene no orden públika ba FALINTIL-Forsa DefezaTimor-Leste (F-FDTL).
“Ohin ekipa konjunta Sekretaria Estadu Asuntu Toponímia no Organizasaun Urbana (SEATOU) mai iha FALINTIL-Forsa Defeza Timor-Leste (F-FDTL) atu sensibiliza Dekretu-lei 33/ 2008 no mós primeiru Dekretu-lei 3/2024 ba maluk forsa sira hotu. Ita mai halo sensibilizasaun ba maluk forsa sira hotu nune’e bele lori fali informasaun ne’e bá família no kolega iha sira-nia hela fatin,” Germano dehan ba jornalista sira iha Kuartél Jenerál Fatuhada.
Nia esplika liuhosi Dekretu-lei ne’e bele kontribui ba ijiene no orden públika iha sidade Dili.
“Ita-nia prezensa lá’ós mai atu hanorin F-FDTL, maibé ita mai atu fahe de’it informasaun ne’e atu sira bele apár liután servisu SEATOU nian iha terrenu, hodi bá futuru ne’e servisu bele la’o di’ak liután,” nia informa.
Iha fatin hanesan, Xefe Gabinete Apoiu Sosiál F-FDTL, Koronél Alberto Freitas do Santos hateten sensibilizasaun Dekretu-lei númeru 3/2024 ne’e importante ba ema hotu atu kontribui ba dezenvolvimentu nasionál.
“Tanba ne’e atu hatete Dekretu-lei hotu-hotu ne’ebé Estadu Governu estabelese no sensibiliza importante ba sidadaun hotu-hotu atu la’o tuir,” nia tenik.
Jornalista: Osória Marques
Editór: Xisto Freitas da Piedade
