DILI, 23 Outubru 2025 (TATOLI)—Komisaun A ne’ebé trata asuntu Justisa no Konstitusionál iha Parlamentu Nasionál (PN), Kinta ne’e, halo audiénsia públika ho Komisaun Antí-Korrupsaun (CAC, sigla portugés) relasiona ho alokasaun Orsamentu Jerál Estadu (OJE) 2026 ba instituisaun independente ne’e.
Biban ne’e, Komisáriu CAC, Rui Pereira dos Santos hateten, instituisaun ne’e hakarak mantein orsamentu 2026 ho montante millaun $2,2 tanba atu finansia programa no atividade.
“Ami-nia orsamentu ne’ebé mak aprova iha Komité Revizaun Orsamentu (KRO) hamutuk millaun $2,2, nune’e ohin ami mai iha Parlamentu atu husu mantein orsamentu ne’e,” Rui Pereira informa ba Jornalista sira hafoin halo audiénsia públilka ho Komisaun A.
Notísia relevante : CAC aprezenta progresu serbisu ba PPN, fó énfaze ba kombate korrupsaun
Orsamentu ba tinan oin sei finansia atividade CAC ne’ebé liga ba prevensaun korrupsaun no finansia programa prioridade sira hanesan Estratejia Nasionál Antí-Korrupsaun (ENAK) no Kurríkulu Antí-Korrupsaun, ne’e bé sei hanorin iha universidade.
Antes ne’e, Ministériu Finansa (MF) atribui tetu orsamentu 2026 ba CAC ho montante millaun $1,6, maibé hafoin halo ezersísiu ba tetu ne’e la sufiente atu kobre ba atividade no programa.
Iha iha ámbitu KRO, Jestór no Responsável CAC husu osan adisionál $700.000-resin, nune’e membru KRO aprova adisionál $6.00.000-resin, hodi posibilita osan montante millaun $2,2 ba tinan oin.
Orsamentu ne’e atu finansia programa boot rua bazeia ba Lei CAC, ne’ebé instituisaun ne’e mak halo prevensaun, sensibilizasaun no investigasaun ba kazu korrupsaun sira inklui halo atividade UNCAC.
“Ami ohin la husu tan adisionál ba Parlamentu maibé husu ba sira atu apoia nafatin osan CAC nian ne’e ho montante millaun $2,2,” nia katak.
Aleinde ne’e, CAC iha planu atu sosa karreta operasionál lima tanba karreta ne’ebé daudaun iha ho tinan 10 ba leten ona.
CAC daudaun ne’e iha karreta 16 no sei halo leilaun ba karreta haat iha tinan ne’e.
Jornalista : Natalino Costa
Editora : Julia Chatarina
