DILI, 30 Outubru 2025 (TATOLI)–Ekipa Futeból Feto husi Asosiasaun Aileu sai kampiaun Kopa Juvenil Sub-17 tinan 2025.
Ekipa Asosiasaun Aileu sai na’in ba vitória Kopa Juveníl tinan 2025 bainhira iha jogu finál halakon ekipa Asosiasaun Futeból Ermera ho skor 8-1 iha Estádiu Munisipál Dili, Kinta ne’e.
Iha inísiu jogu, Aileu inisia kedas atake no elementu husi treinadór Mingos ne’e konsege prodús golu 4-1 iha parte dahuluk liuhosi jogadora sira hanesan Leliana iha minutu 10, Emercia da Costa minutu 28, Epifânia da Costa minutu 30 no Terezinha Mesquita iha minutu 35.
Notísia relevante: Ekipa feto husi Aileu garante sai kampiaun Kopa Juveníl Sub-17
Enkuantu, Ermera halo kombate hodi rezulta golu iha minutu 15 liuhosi jogadora Rivania Neno kauza husi liña defeza ne’ebé laiha koordenasaun no fallansu husi guarda rede.
Iha parte daruak, Ermera ne’ebé defisit golu inisia atake maibé husik hela fallansu iha área defeza no erru iha parte dahuluk nune’e fásil ba Aileu aumenta golu haat liuhosi jogadora sira hanesan Epifânia da Costa iha minutu 47, Terezinha Mesquita 52, Leliana da Santos 59 no Emercia da Costa iha minutu 62 hodi taka jogu ho skor 8-1.
Treinadór Asosiasaun Futeból Aileu, Domingos dos Santos Silva, hato’o sentimentu kontente no apresia ho esforsu jogadora ne’ebé durante ne’e esforsu liuhosi treinu no implementa iha kampu hodi hetan rezultadu kampiaun tasa Kopa Juveníl Sub-17 tinan 2025.
“Tasa ida-ne’e ami oferese ba autoridade munisipál no adeptu Aileu,” Mingos informa ba TATOLI.
Mingos relata, ho kompetisaun futeból feto iha Kopa Juveníl Sub-17 hatudu ba adeptu iha Timor-Leste relasiona ho perspetiva iha públiku feto la’ós iha uma no hala’o kna’ar iha dapur maibé futeból iguál ba ema iha mundu.
Entretantu, ho rezultadu vitória ne’ebé Asosiasaun Futeból Aileu gaña parte Komisaun oferese tasa kampiaun, medalla inklui osan ho montante rihun $2, enkuantu Asosiasaun Futeból Ermera nu’udár segundu lugár hetan medalla inklui orsamentu ho valór $ 1.500.
Jornalista: Natalino Belo
Editór: Xisto Freitas da Piedade
