DILI, 06 Novembru 2025 (TATOLI)—Governu Konstitusionál da-sia (IX) sei selu dívida públika millaun $10 ba ospitál sira iha rai-li’ur ne’ebé durante ne’e halo tratamentu ba pasiente transferénsia husi Timor-Leste.
Notísia Relevante: MS selu ona divida ba ospitál tolu iha rai-li’ur
“Iha tinan ida-ne’e, Governu sei selu dívida miliaun $10. Dívida ba halo tratamentu iha ospitál rai-li’ur nian, hakarak dokumentasaun ami bele aprezenta hotu. Tanba, dívida ba tratamentu iha ospitál rai-li’ur mai husi Governu da-ualu ho montante millaun $32. Maibé tanba ho kuantidade ne’e ita labele halo pagamentu hotu kedas iha tinan ida, nune’e ami ko’alia ona ho ospitál sira koonkorda malu atu selu uitoan-uitoan,” Primeiru-Ministru, KayRrala Xanana Gusmão, hateten kestaun ne’e hodi hatán ba intervensaun husi deputadu Helder Freitas dehan dívida seidauk selu hotu, iha debate OJE 2026 nian iha loron daruak iha faze jeneralidade, ohin.
Xefe Governu hateten, aat liu fali mak dokumentu ne’ebé sira simu deteta balun falsifikasaun barak nune’e sira haruka fali ba parte kompeténsia dehan loos duni ka ida-ne’e sala.
“Ami la selu de’it maibé sei haruka resivu mai ami kurize neineik, nune’e atu dehan de’it katak ne’e la’os Governu da-sia nian,” nia relata.
Ministra Finansa, Santina Cardoso, hateten kona-ba dívida públika ne’e MF halo revizaun ba imprestímu ne’ebé iha la’ós kansela hotu kedas.
“Maibé ba dívida ne’ebé iha bainhira ami simu responsabilidade ba mandatu ne’e, dívida sira-ne’e iha ona millaun $600-resin no totál ida-ne’ebé implementa tiha ona ne’e hamutuk biliaun $1. Ita kansela ona millaun $188 no selu ita halo reestruturasaun iha banku ADB,” nia informa.
Iha fatin hanesan, Ministra Saúde, Elia dos Reis Amaral, hateten bainhira Governu konstitusionál da-sia hahú inísia nia mandatu divída ne’ebé iha ne’e husik hela husi Governu anteriór.
“Tanbasá mak dívida ne’e ita selu neineik tanba ami deteta iha klauzula 50% no ita lahatene osan sira-ne’e sé mak simu no ba hotu iha ne’ebé, hela rihun $38 mak seidauk selu entaun ami sei selu ho fazeadamente,” nia hateten.
Jornalista : Alexandra da Costa
Editór : Cancio Ximenes
