DILI, 06 Novembru 2025 (TATOLI)–Centro Nacional Chega!, Instutu Públiku (CNC, I.P), tinan ne’e, finaliza no oferese tan Uma Memória Esperansa neen ba sobrevivente sira.
Diretór Divizaun Solidaridade Sobrevivente iha CNC, I.P, Nelson Miranda Seixas hateten, husi uma neen ne’e, rua entrega uluk iha fulan hirak ba kotuk iha Kairui Baukau no Ainaru, fulan ne’e sei entrega tan rua iha Alas no Fatuberli Munisípiu Manufahi tanba finaliza ona hein entrega de’it, enkuantu rua seluk iha hela prosesu finalizasaun nune’e iha Dezembru mak entrega tan iha Munisípiu Baukau.
“Uma neen ne’ebé ita konstrui ho totál orsamentu $111.000, kada uma ho kustu la liu $14.000. Ba tinan oin, ita-nia orsamentu hetan redusaun maka’as, entaun osan atu apoiu ba uma laiha, maibé ita tenta tau nafatin nune’e tinan oin halo uma ida de’it ba sobrevivente ida, nune’e atividade ne’e labele lakon,” Diretór informa ba Agência TATOLI iha edifísiu CNC, I.P, Kinta ne’e.
Dirijente ne’e konsidera, benefisiáriu ba Uma Memória Esperansa ne’e merese duni atu hetan tanba inisiativa ne’e hanesan parte ida husi programa reparasaun ba vítima no sobrevivente sira ba konflitu polítiku neʼebé mak akontese iha tempu pasada.
Notísia relevante : CNC, I.P prioriza munisípiu haat sai alvu ba implementasaun uma memória esperansa
CNC, I.P implementa programa Uma Memória Esperansa hahú husi tinan 2021 to’o 2024, ne’ebé to’o agora konsege halo ona uma hamutuk 20 hodi oferese ba vítima funu.
Uma ne’ebé estebelese ona kuaze iha munisípiu hotu, falta Munisípiu Manatutu no Ermera mak seidauk.
Diretór ne’e esplika, uma sira ne’ebé fó ba sobrevivente sira ne’ebé mak konsideradu vulnerável liu no presiza duni hetan fatin dignu.
Kada uma ho medida metru 7×9, kompostu husi kuartu tolu, hariis fatin iha laran, sala vizita no dapur iha li’ur.
Jornalista : Arminda Fonseca
Editora : Julia Chatarina
