DILI, 10 Novembru 2025 (TATOLI)—Ekipa Buibere Football Club kompromitidu kontinua hadi’a liña jogadora hodi garante pozisaun iha kompetisaun primeira divizaun Liga Futeból Femininu Timor-Leste (LFFTL).
Asistente Treinadór Buibere FC, Salomao Soares esplika mezmu to’o jornada datoluk Buibere FC gaña pontu sia (9) maibé kada jogu ne’ebé hatudu presiza evalua no kontinua treinu liuliu hadi’a kualidade jogadora sira-ne’ebé kolokadu iha kada liña tantu defeza, médiu no avansada.
“Rezultadu di’ak maibé presiza hadi’a di’ak liután ekipa ne’e nune’e jogu tuir mai bele hatudu rezultadu pozitivu,” Salomao Soares informa ba TATOLI iha Estádiu Munisipál Dili, Domingu ne’e.
Notísia relevante: Buibere FC halakon Akadémika 1-5
Salomao relata fallansu ne’ebé identifikadu iha liña avansada kuaze jogadora seidauk utiliza oportunidade ho di’ak nune’e falla prodús golu, enkuantu parte médiu presiza hadi’a liña koordenasaun nune’e distribui bola tuir alvu.
“Kada jogu tenke hadi’a,” Salomao Soares subliña.
Entretantu, Buibere FC rasik iha jogu jornada datoluk konsege manán Akadémika FC ho skor 5-1 hodi lori okupa iha pozisaun daruak ho totál pontu sia (9), rezultadu husi jogu tolu (3), manán tolu (3).
Jornalista: Natalino Belo
Editór: Xisto Freitas da Piedade
