Despede Forsa Tarefa, PM Xanana: “Ami fó fiar tomak ba imi”
DILI, 11 Novembru 2025 (TATOLI)—Primeiru-Ministru (PM), Kay Rala Xanana Gusmão, Tersa ne’e, partisipa iha parada militár FALINTIL-Forsa Defeza Timor-Leste (F-FDTL) ne’ebé atu desloka bá Filipina halo Misaun Apoia Umanitária.
Kontijente sira ne’ebé hanaran Forsa Tarefa Konjunta kompostu husi membru F-FDTL 120, pesoál husi Autoridade Protesaun Sivil Diresaun Bombeiru na’in-20, Servisu Saúde na’in-neen no Institutu Jestaun Ekipamentu Dezenvolvimentu Infrastrutura, Institutu Públiku (IGEADI, I.P) reprezenta husi ema na’in-haat.
PM Xanana dehan, Forsa Tarefa Konjunta nia serbisu loloos mak atu fó ajuda umanitária ba komunidade afetadu kalamidade iha Filipina.
“Ami fó fiar tomak ba imi, la’ós atu foti Timor-Leste nia naran atu hatudu katak timoroan, maibé nu’udar timoroan komprometidu atu ajuda sé de’it mak presiza. Ajuda ho fuan, ajuda la’ós dehan ida-ne’e ida-ne’ebá, lae! Maibé ajuda ho laran tomak,” Xanana hateten iha Kuartel Jenerál F-FDTL, Fatuhada.
Primeiru-Ministru husu ba kontijente sira atu serbisu ho responsabilidade no tenke serbisu ajuda povu Filipina.
“Imi serbisu maka’as, kuandu imi serbisu maka’as ne’e ajuda tebes, imi tenke foer maka’as, imi foer ne’e la buat ida, ne’ebé ami fiar ba imi katak imi bá ho laran tomak ho isin tomak ho imi-nia vontade tomak atu serbisu ajuda sira,” nia akresenta.
Notísia relevante : Governu despede kontijente na’in-150 fó asisténsia umanitária iha Filipina
Xefe Governu fó hanoin, bainhira iha kontijente ruma mak sente kolen no moras demais, bele fila hodi deskansa.
“Liuliu imi sira forsas, hodi hatudu iha ASEAN tomak katak Estadu la’ós prepara ami atu funu, maibé prepara ami atu bá halo ajuda umanitária,” nia katak.
PM konsidera, misaun ne’e atu hatudu kompromisu katak atu ajuda la’ós bá atu pasiar.
“Imi-nia kompromisiu ba rai ne’e no ba misaun ida-ne’e mak bá atu ajuda la’ós bá atu pasiar. Bá atu halo, bá atu kaer, bá atu hafoer-an. Ne’ebé imi bá imi idaidak reprezenta povu ida-ne’e kole bele kole, moras bele moras, maibé ita bá ne’e la’ós atu foti Timor-Leste nia naran, ita bá ne’e atu fó apoiu,” nia fó hanoin.
Xanana hatutan: “Ita bá ne’e fó apoiu, ita bá ne’e ho konvisaun, atu fó apoiu no atu ajuda. Ita ohin haree komunidade afeta maka’as, inan aman ho oan sira afeta bee laiha, ida-ne’e ajuda fó asisténsia umanitária ba sira.”
PM dehan, iha planu Forsa Tarefa konjunta ne’e bá fó apoiu povu Filipina ne’ebé enfrenta dezastre ne’e durante loron-20 maibé iha posibilidade bele aumenta fulan-ida ka rua to’o fulan-tolu.
“Tanba ne’e, ba hirak ne’ebé kole, kuandu dehan moras bá deskansa fila mai seluk bá fali hodi apreende nafatin to’o misaun ne’e hotu. Ida-ne’e mak imi-nia misaun,” nia tenik.
Iha fatin hanesan, Xefe Estadu Maiór Jenerál Forsa Armada (XEMGFA), Tenente Jenerál Domingos Raul ‘Falur Rate Laek’ agradese ba PM Xanana ne’ebé bele partisipa iha serimónia ne’e.
“Ita-boot nia prezensa sai nafatin sinál destinu de enkorajamentu, maski institisaun FFDTL enfreta dezafiu maibé ho ita-boot nia prezensa bele motiva no enkoraja Forsa Tarefa sira halo serbisu no tuir esperiénsia ita-boot nian,” nia hato’o.
Falur introdús Koronél Graduadu Vitór Soares mak sei lidera kontijente Forsa Tarefa Konjunta ne’ebé atu halo misaun umanitária iha Filipina.
Iha biban ne’e, introdús mós Majór Infantaria José Martins nu’udar Segundu Komandante ba Forsa Tarefa Konjunta ne’ebé atu halo misaun umanitária iha Filipina.
“Sira hotu ne’ebé mak iha ne’e, iha koñesimentu akadémiku relasaun internasionál,” nia katak.
Jornalista : Natalino Costa
Editora : Julia Chatarina
