DILI, 27 Novembru 2025 (TATOLI)—Ekipa S’amuser FC lidera hikas tabela klasifikasaun primeira divizaun Liga Futeból Femeninu Timor-Leste (LFFTL) jornada datoluk hafoin manán Kulugisa FC ho skor boot 24-0.
S’amuser FC lidera pozisaun dahuluk ne’e bainhira kontajen pontu hanesan ho ekipa Buibere FC maibé jogadora Dolores Costa Cs manán produtividade golu ho totál 31 bainhira kompara ho Buibere FC ne’ebé rekolla bola 24.
S’amuser FC rasik hadau pozisaun dahuluk husi AD SLB ne’ebé antes ne’e lidera ho pontu neen (6) maibé ekipa husi Laulara rekolla pontu ida (1) hafoin impata kontra Maranatha 1-1 iha jogu jornada datoluk.
Notísia relevante: S’amuser FC hikis Kulugisa 24-0
Enkuantu, pozisaun daruak okupa husi Buibere FC ne’ebé rekolla pontu sia (9) hafoin manán 5-1 kontra Akadémika FC no AD SLB okupa opozisaun datoluk ho totál pontu hitu (7), rezultadu manán rua (2) no impata ida (1).
Aleinde ne’e, Maudoko FC obrigadu tun ba pozisaun dahaat ho pontu hitu (7) mezmu produtividade golu 13 bainhira kompara ho ho AD SLB ne’ebé rekolla produtividade 20.
Akadémika FC iha pozisaun dalimak ho pontu tolu (3), rezultadu manán ida (1) no derrota rua (2), tuir kedas UNITAL FC iha pozisaun daneen ho pontu tolu (3) no VDL FC iha pozisaun dahitu ho pontu tolu (3), rezultadu husi manán ida (1) no derrora rua (2).
Ekipa tolu seluk hanesan Maranatha FC okupa iha pozisaun daualu bainhira rekolla pontu rua (2), rezultadu husi impata rua (2) no derrota ida (1), enkuantu ekipa Na’in-Feto FC sei pontu 0 nune’e obrigadu tenke okupa iha pozisaun dasiak no Kulugisa FC iha pozisaun sanulu (10) hafoin derrota tolu (3) husi totál jogu tolu (3).
Jornalista: Natalino Belo
Editór: Xisto Freitas da Piedade
