Ministru Defeza husu joven prezerva valór istória Masakre Santa Krús
DILI, 11 Novembru 2025 (TATOLI)–Ministru Defeza, Kontra Almirante Donaciano do Rosário da Costa Gomes ‘Pedro Klamar Fuik’ husu ba joven, iha ámbitu post independénsia atu prezerva valór istória husi Masakre Santa Krús 12 Novembru 1991 atu nune’e bele hatene istória independénsia Timor-Leste nian.
“Ba timoroan hothotu, liuliu ba joven sira ne’ebé mak boot iha pos independénsia atubele iha konsiénsia ida-ne’ebé metin kona-ba ita-nia istória ba libertasaun nasionál. Valór hotu ne’ebé mak joventude halo iha pasadu fó sira-nia vida rasik para atu liberta rai ne’e,” Donaciano Gomes hateten ba Jornalista sira iha Kuartel Jenerál FALINTIL-Forsa Defeza Timor-Leste (F-FDTL), Fatuhada, Tersa ne’e.
Notísia relevante :Masakre Santa Krús hanesan rezisténsia boot husi joven sira
Nia dehan, independénsia ne’e konkista ho sakrifísiu barak tanba ne’e presiza hanoin saida mak bele kontribui ba rai ida-ne’e.
“Primeiru tenke hanoin katak ita-nia independénsia ne’e ita konkista ho sakrifisiu barak, segundu tenke hanoin hanesan juventude saida mak bele kontribui ba independénsia ne’e terseiru hanoin beibeik hanesan joventude lori independénsia Timor-Leste ne’e bá futuru no lori Timór bá mundu,” nia akresenta.
Nune’e, Governante ne’e husu ba joven sira atu halo tuir buat tolu ne’e atubele hatutan joven sira uluk nia misaun.
“Ida-ne’e mak ha’u nia mesajen tolu ba joventude sira atu komemora 12 Novembru hanoin hikas filafali ita-nia maun alin sira ne’ebé mak mate iha ita-nia libertasaun, mate iha trajédia Santa Kruz 12 Novembru,” nia katak.
Jornalista : Natalino Costa
Editora : Julia Chatarina
