DILI, 10 Novembru 2025 (TATOLI)-Ministériu Transporte no Komunikasaun (MTK), liuhusi Diresaun Nasionál Transporte Terrestre (DNTT) planeia sosa blanku ba karta kondusaun no livrete ho osan montante rihun $185.
Diretór-Jerál Administrasaun no Finansa MTK, Aniceto Leto Soro, hateten públiku daudaun ne’e preokupa kona-ba blanku ba karta kondusaun motór no livrete ba karreta, tanba blanku hotu dezde fulan rua liubá.
“Prosesu aprovizionamentu halo ona, tanba orsamentu ba ida-ne’e disponivel hamutuk rihun $185, nune’e sedu liu fulan-Novembru nia rohan ne’e ita distribui, la’e inísiu Dezembru bele fahe ona ba públiku”, Aniceto Leto Soro dehan ba Tatoli, ohin.
Nia salienta katak totál blanku ne’ebé atu sosa ba motór hamutuk rihun 40 no livrete ba karreta mós rihun 40, maibe númeru ne’e bele liu bainhira empreza manán ho folin ki’ik.
Prosesu prodús blanku iha Timor-Leste seidauk iha mákina, nune’e nafatin halo iha Indonézia, maibé empreza ne’ebé sai manán-na’in tenke uza letter of support.
Lembra katak, iha 2023, DNTT sosa ona blanku ba karreta no motór hamutuk rihun 44 ho kustu rihun $76, ne’ebé distribui iha tinan 2024.
Notisía relevante: DNTT prodús blanku transporte hamutuk 44.000 iha tinan 2023
Jornalista: Arminda Fonseca
Editora: Maria Auxiliadora
