DILI, 11 Novembru (TATOLI)-Parlamentu Nasionál liuhusi reuniaun plenária aprova votu pezár no solidariedade ba povu no Estadu husi Filipina no Vietname ne’ebé hasoru dezastre naturál Tufaun.
Deputadu sira aprova votu ne’e ho a favór 59, kontra no abstensaun laiha.”Ne’ebé votu pezár ne’e pasa”, Prezidente Parlamentu Nasionál, Maria Fernanda Lay, fó sai iha sala plenária, ohin.
Sekretária Meza PN, Virgínia Ana Belo, halo leitura votu númeru 16/2025 pezár no solidariedade ba vítima Tufaun, ne’ebé akontese iha Filipina no Vietname.
“Ho profundu tristeza no konsternasaun, Parlamentu Nasionál simu notísia devastadór Tufaun Kalmaegi, ne’ebé halakon vida no kauza trajédia umanitária proporsaun boot iha Filipina, no liuhusi ne’e mós ho eskala ki’ik iha Vietname”, nia hateten.
Hodi hatutan katak Tufaun karaterizadu husi eventu intensu, udan boot, inundasaun devastadór no deslizamentu rai, rezulta iha trajédia ema lakon vida 100-resin, rejista vítima lubun lakon, kanek no dezalojadu no estragu hela fatin ho seluk tan.
Nune’e, Parlamentu dezeja tranzmite enkorajamentu espesiál ba bombeiru, forsa seguransa, voluntáriu sira, traballadór umanitáriu no populasaun afetada, demonstra korajen no reziliénsia admiravel iha luta kontra elementu sira no apoiu ba vítima sira, mezmu ho kondisaun estrema.
“Reafirma mós ita-nia kompromisu ho kooperasaun rejionál no internasionál, nomeadamente iha ámbitu ASEAN, ba prevensaun no mitigasaun dezastre naturál, liuhusi uniaun, apoiu mútuo no asaun koordenada bele enfrenta dezafiu sira husi natureza no alterasaun klimátika”, nia hato’o.
Momentu ne’e Parlamentu espresa nia sentidu pezár ba katástrofe ne’e, manifesta ninia solidariedade ba vítima sira ho ninia família no aprezenta sinsera kondolénsia ba trajédia ne’e.
Proposta votu pezár ne’e aprezenta husi proponente deputadu bankada parlamentár CNRT, PD, FRETILIN no KHUNTO.
Deputadu CNRT, Patrocínio dos Reis Fernandes, hateten votu ne’e hatudu solidariedade ba povu no Estadu país rua. No fó apoiu tomak ba desizaun Governu nian atu organiza apoiu umanitáriu.
Notísia relevante: https://tatoli.tl/2025/11/06/pm-xanana-hatoo-solidariedade-ba-povu-filipina/
Jornalista: Nelson de Sousa
Editora: Maria Auxiliadora
