MALIANA, 12 Novembru 2025 (TATOLI) – Autoridade no populasaun Maliana marka, ohin, Maskre Santa Krús ba da-34 (1991-2025) no selebra Loron Nasionál Juventude ho misa agradesimentu.
Iha selebrasaun eukarístika ne’e, Bispu Dioseze Maliana, Don Norberto do Amaral, hateten espíritu saudozu loriku asu’ain sira -nian tenke sai hanesan espellu ida ba jerasaun foun atu kontinua tane aas valór umanidade, maun-alin, no devosaun ba rai-lulik.
Nia subliña katak Masakre Santa Krús simboliza luta juventude Timor-Leste nian ne’ebé prontu atu sakrifika sira-nia vida ba lia-loos no independénsia país nian.
“Ita selebra 12 Novembru atu hanoin kona-ba ita-nia moris. Ita sira ne’ebé hela iha mundu ne’e atu hanoin oinsá fó-an tomak ba serbisu ho neon ho laran ba nasaun ida-ne’e nia moris, maibé ho finalidade ida, hamutuk ida de’it, ita luta ho fi’ar ida de’it, laran-metin ida de’it, karidade ida-de’it hodi la’o, ka’er didi’ak ita-nia moris ho fin ida atu hetan moris rohan-la’ek”, bispu hato’o iha nia omília iha Igreja Pró-Katedrál Santa Krús, Maliana.
Prezidente Koferénsia Episkopál Timorense ne’e fó hanoin ba sarani katólika no povu timoroan tomak katak loron 12 Novembru la’ós de’it sai momentu ida atu hanoin hikas akontesimentu trájiku sira iha Semitériu Santa Krús, maibé sai mós oportunidade atu reflete kona-ba moris no hafoun fali ema nia rezolusaun hodi serbí nasaun ho konfiansa no firmeza.
“Ohin ita selebra festa 12 Novembru, festa ba loron ida ne’ebé sira fó sira nia-an tomak atu hatudu ba mundu ida-ne’e, tanba hahú iha 1975 to’o 1991 ne’e ema kumu metin hela, teki-teki nakloke ho akontesimentu iha Santa Krús, mundu hotu-hotu fó apoia ba Timor-Leste”, Dom Norberto relembra.
Agusto Caetano, Prezidente Komisaun Organizadora 12 Novembru iha postu administrativu Maliana, dehan komemorasaun loron ne’e ho tema “Ha’u, Timor-oan, orgullu ho ha’u-nia rain”.
Tuir nia, tema ne’e reflete gratidaun no orgullu povu timoroan ba nia independénsia no realizasaun nasaun nian iha palku internasionál.
“Ami sente orgullu tanba sai hanesan membru sira husi ONU, CPLP, g7+, no ASEAN. Ami hein katak to’o tinan 2027, Bobonaru bele jere totalmente ekonomia sidade nian rasik”, nia espera.
Komemorasaun loron 12 Novembru iha Maliana inklui misa santa, serimónia fó onra ba vírima Santa Krús liuhusi atvidade prosesaun husi Igreja Santa Krús Maliana bá to’o semitériu Santa Krús hodi sunu lilin no kari ai-funan hodi relembra akontesimentu Masakre Santa Krús iha tinan 34 bá kotuk.
Antes ne’e, Komisaun Organizadora mós realiza atividade refletivu ne’ebé envolve juventude, komunidade, estudante, no ofisiál governu lokál sira.
Notísia relevante: Trajédia Santa Krús sai pontu virajen ba TL nia luta no ukun rasik-an
Jornalista: Sérgio da Cruz
Editora: Mari Auxiliadora
