OEKUSI, 17 Novembru 2025 (TATOLI) – Prezidente Autoridade Rejiaun Administrativa Espesiál Oekusi Ambeno (RAEOA), Régio da Cruz Salu, segunda ohin, hala’o enkontru ho funsionáriu kazuál 26 inklui alumni Arava International Center for Agriculturál Training (AICAT) – Sentru Internasionál Treinamentu Agrikultura Arava, hodi orienta polítika atu reforsa setór agrikultura Oekusi liuhusi hasa’e produsaun agríkola.
“Funsionáriu kazuál 26 ne’e la’ós maioria alumni AICAT, maibé iha na’in-sia ka 10 mak alumni. Ohin ita orienta sira, tanba ita hakarak adota modelu inspirasaun ne’ebé sira forma ona iha nasaun Israel, Kuba no nasaun seluktan, signifika tenke investe. Ohin ami mai iha ne’e, importante atu orienta agrikultura ne’e ba liu merkadu, alende, ita haree reforsu institusionál planeamentu no modelu agro-negosíu, nune’e ita-nia merkadu ne’e tenke iha produtu,” nia hateten iha salaun agrikultura Oekusi, ohin.
Antigu Sekretáriu Rejionál Agrikultura ne’e esplika esplika, orientasaun ne’e nu’udar preparasaun tanba iha loron 28 Novembru iha ámbitu komemorasaun loron Proklamasaun 28 Novembru 2025, Autoridade RAEOA sei selebra akordu ofisiál ida ho Autoridade Timur Tenggah Utara (TTU), atu reativa hikas merkadu sira iha liña fronteira, ne’ebé alvu atu promove liu ba produtu agrikultura sira.
Entaun saida mak prepara, mak orientasaun ba agro-negósiu agora tenke bok daudaun, labele tinan ba tinan, limitadu de’it iha demplotu, entaun bainhira mak ba kampu agro komersíu atu sai mós fonte reseita ba rejionál atu hasa’e kresimentu ekonomia lokál, nune’e bele garantia povu nia partisipasaun iha investimentu, tanba agrikultura mak poténsia ida-ne’ebé besikliu ho povu.
Notísia relevante:Autoridade RAEOA sei re-integra alumni AICAT atu reforsa setór agrikultura Oekusi
“Ida-ne’e sai alvu prinsipál, dezenvolvimentu ne’ebé inkluzivu iha setór agrikultura ne’e nesesáriu ba povu, tanba 80% povu Oekusi moris ho agrikultura subsisténsia, 1% de’it mak kuda atu faan ba merkadu sira, entaun rendimentu agrikultura ba reseita domestika durante ne’e lala’o, ne’ebé orientasaun ne’e tanba iha mós ZEEDOA, agora ita tenke prepara atu la’o ba oin,” nia afirma.
Notísia relevante:MAPPF prioriza setór agrikultura hodi hasa’e investimentu ekonómia rai-laran
Iha fatin hanesan, Diretór Diresaun Rejionál Agrikultura, José Oqui defende katak funsionáriu kazuál 26 barakliu formandu ona ho esperiénsia natoon atu haforsa setór agrikultura Oekusi, liu-liu hasa’e produsaun.
“Ami hanesan diresaun tékniku, prontu atu ezekuta orientasaun ne’ebé ohin hato’o ona, pontu primeiru mak oinsá organiza malu atu hasa’e produsaun alimentar, pekuária, ortikultura, peska, floresta, tan ne’e antes ne’e ita kontrata ona sira na’in-26 inklui alumni AICAT atu reforsa ita-nia polítika sira-ne’e, ne’ebé molok ita dezloka sira ba terrenu, ita konvida Prezidente Autoridade atu hato’o orientasaun polítika ruma, nune’e bele sai hanesan motivasaun, tanba promesa ida mak tenke kumpre, merenda eskolár iha Oekusi ita bele atende, primeiru labele hanoin buat bo’ot sira, ita hahú uluk husi kraik mak sa’e,” nia hateten.
Notísia relevante:Agrikultura Oekusi inaugura projetu bee-moos fasilita grupu ortikultura 34 iha Usitasa’e
Entretantu, totál funsionáriu iha Diresaun Rejionál Agrikultura Oekusi, hamutuk na’in 200-resin ne’ebé serbí iha departamentu sira hotu.
Jornalista: Abílio Elo Nini
Editór: Rafael Ximenes de A. Belo
