DILI, 24 Novembru 2025 (TATOLI)-Banku Aziátiku Dezenbolvimentu (ADB) apoiu fundu miliaun $4 ba Governu Timor-Leste liuhusi Ministéria Finansa no Ministériu Obra Públika, hodi implementa projetu prevensaun dezastre naturál liuhusi reabilitasaun estrada dirasaun husi Ermera ba Fatubesi kilómetru 11, no sei konstrui mós drainajen hodi fó espasu ba bee-dalan.
Notísia Relevate: Governu lansa reabilitasaun estrada iha Seloi Kraik bá Glenu
Diretora Banku Dezenvolvimentu Aziátiku iha Timor-Leste, Stefania Dina, hateten momentu ida-ne’e sai hanesan testamentu ida ba parseria ne’ebé dura entre Governu Timor-Leste no Banku Dezenvolvimentu Aziátiku, hodi reafirma ADB nia dedikasaun hamutuk ba dezenvolvimentu sustentável, inkluzivu no reziliente ba klima.
“Projetu ida-ne’e partikularmente signifikativu tanba ida-ne’e introdús solusaun sira-ne’ebé bazeia ba natureza hanesan resposta ida ba fallansu estrada sira-ne’ebé kauza husi rai-halai no perigu sira seluk ne’ebé relasiona ho klima, hodi inkorpora adaptasaun klimátika iha dezeñu no konstrusaun ba Ermera no Fatubessi,” Diretora ADB ne’e informa iha ninia diskursu ne’bé hala’o iha Ministériu Finansa, Aitarak-Laran, ohin.
Dirijente ne’e informa, prosesu aprovizionamentu ne’ebé fornese ba obra sivíl sira sei fó sai iha nivel nasionál hodi fó oportunidade ba empreza konstrusaun nasionál sira atu partisipa, no ida-ne’e mós sei envolve ativamente komunidade hodi garante katak sira hetan benefísiu ho ekuitativu.
“ADB nia kompromisu habelar liu finansiamentu projetu nian hodi harii kapasidade institusionál no téknika. Iha parseria ho aprovizionamentu Nasionál iha ona komisaun no Ministériu Obra Públika, ami entrega hela workshop ka formasaun alvu sira iha aprovizionamentu no jestaun kontratu iha fulan ida-ne’e nia rohan,” nia informa.
Ministra Finansa, Santina Cardoso, hateten ohin Ministériu Finansas asina akordu ida ho ADB hodi apoiu osan hamutuk millaun $4 ba implementasaun projetu reabilitasaun estrada Ermera ba Fatubesi.
“Ne’e la’ós atu konstrui de’it estrada maibé atu halo prevensaun ba rai-monu husi dezastre naturál, nune’e sei fó ba MOP hodi jere situasaun ne’ebá,” nia hateten.
Enkuantu, ministra dehan, prosesu aprovizionamentu sei hala’o iha interna ministeriál nian, tanba ne’e osan ajuda no la’ós impréstimu ka uza fundu infraestrutura.
Ministru Obra Públika, Samuel Marçal, hateten ohin loron Governu Timor-Leste asina akordu ida ho ADB, ne’ebé sira fó apoiu ida ba povu Timor ba reabilitasaun estrada Ermera ba Fatubesi, tanba sira komprende di’ak tebes ita-nia situasaun klimátika iha área rurál.
“Aleinde ne’e ADB la’ós ajuda de’it iha estrada maibé sira mós ajuda iha parte bee-moos nian. Ita apresia tebes ba sira, tanba la’ós hanesan ho banku seluk ne’ebé iha rekezitu barak tebes,” nia dehan.
Nia hatutan, prosesu implementasaun sira sei hahú iha tinan oin, tanba agora foin asina akordu nune’e sei iha mós prosesu aprovizionamentu hodi define kompañia ne’ebé atu kaer projetu ne’e.
Jornalista : Alexandra da Costa
Editór : Cancio Ximenes
