DILI, 24 Novembru 2025 (TATOLI)—Ministru Administrasaun Estatál (MAE), Tomás do Rosário Cabral husu autoridade sira iha Munisípiu Baukau, Bobonaru, Dili no Ermera, atu aselera prosesu dadus populasaun online.
“Finaliza tiha dadus populasaun online ne’e no presiza koordena ho Prezidente Autoridade Munisípiu hodi dijitaliza tiha prosesu ne’e tanba prosesu ne’e pendente barak liu maka Munisipiu Baukau, Dili, Bobonaru no Ermera tanba númeru populasaun boot,” Ministru Cabral dehan ba jornalista sira iha resintu MAE, Kolmera, Dili, Segunda ne’e.
Cabral dehan, oportunidade Prezidente Autoridade Munisípiu no Xefe Suku sira iha-ne’e hakarak apela katak Vise-Ministru Administrasaun Estatál, Jacinto Rigoberto sei tun filafali ba munisípiu sira hodi haree kestaun referida.
“Ha’u husu ba diresaun jerál sira tenke haka’as aan iha tinan ida-ne’e nia laran rekollamentu dadus tenki hotu tanba tinan oin ita atu hatene munisipiu nia populasaun no eleitór hira,” nia dehan.
Governante ne’e hatutan xefe suku sira iha livru 18 ne’ebé sekretáriu nia papél mak tenke rejistu ema sira ne’e, hatene fisa família hira.
Entretantu, Xefe Suku Builai, Juvinal Feliciano da Costa, hateten dadus populasaun online finaliza ona no submete ona ba munisípiu.
“Tanba bainhira ha’u eleitu hanesan xefe suku Builai, ha’u halo servisu administrasaun suku nian ami esforsu hodi halo di’ak no susesu. Ami Suku Builai finaliza ona 100% dadus online nian. Ami-nia relatóriu submete ona ba Postu Administrativu Baukau Vila,” nia haktuir.
Jornalista: Osória Marques
Editór: Xisto Freitas da Piedade
