OEKUSI, 25 Novembru 2025 (TATOLI) – Prezidente Autoridade Rejiaun Administrativa Espesiál Oekusi Ambeno (RAEOA), Régio da Cruz Salu, tersa ne’e, fó-sai, tuir ajenda konfirmadu katak, iha loron kuarta-feira aban, 26 Novembru, Primeiru-Ministru Kay Rala Xanana Gusmão, sei hala’o vizita traballu iha Oekusi ho objetivu atu hatuur loloos estatutu RAEOA no Zona Ekonomia Espesiál Dezenvolvimentu Oekusi Ambeno (ZEEDOA).
Notísia relevante:Prezidente Autoridade RAEOA atualiza progresu servisu ba PM Xanana
Ezekutivu ne’e informa, tanba relasaun ho mandatu Autoridade RAEOA no ZEEDOA antes ne’e fulan tolu de’it, tenke ramata iha 30 Novembru 2025, maibé foin daudaun ne’e Konsellu-Ministru estende tan fulan ida to’o loron 31 Dezembru 2025.
“Hela loron lima, ami ramata ona loron 90 dahuluk nu’udar autoridade RAEOA no ZEEDOA, no foin daudaun Konsellu-Ministru estende tan ami-nia mandatu to’o 31 Dezembru 2025, ne’ebé aban vizita traballu husi Avo Nana mai Oekusi ne’e, atu ita konkorda malu modelu rejiaun espesiál nia lei no lei kona-ba ZEEDOA nian, nune’e tinan oin ita implementa iha baze legál ona, ita la ba kotuk ona, ne’e para administrasaun RAEOA ne’e, haree de’it ba administrasaun públiku sira to’o postu administrativu no munisipíu,” nia hateten iha salaun IADE Oekusi, ohin.
Notísia relevante:Governu sei define estrutura no funsaun Autoridade RAEOA-ZEEDOA
Tuir nia, tanba ZEEDOA ne’e ko’alia de’it ba ekonómia atu lori investór mai harii otél iha Oekusi, no haree ba nia jestaun ne’e oinsá, importa sasán ho folin barratu, haree ba jestaun ekonomia iha merkadu ne’e oinsá, nune’e futuru bele investe tan iha aeroportu, portu no transporte.
Funsaun seluk husi ZEEDOA mak prodús buat ruma, hanesan prodús susu-been karau ka matadouru, maibé povu atu partisipa iha investimentu ne’e tenke kapasita hanesan daudaun sentru formasaun Bansone, ne’ebé koopera di’ak tebes ho Organizasaun Naun Governamentál (ONG) sira no setór privadu sira, atu forma no prepara rekursu umanu ba futuru Oekusi.
“Ne’ebé aban, Maun boot Xanana mai hanesan entidade tuteladu superintendente ezekutiva RAEOA nian, mai hanesan penangung jawab utama (responsavel prinsipál) ba RAEOA, ne’ebé mai atu halo serbisu iha ambiente komemorativa aniversáriu loron proklamasaun 28 Novembru ba tinan 50,” nia afirma.
Notísia relevante:Xanana atualiza ba Xefe Estadu modelu Administrasaun RAEOA
Notísia relevante:Governu aprova rezolusaun ba mandatu konsellu administrativu RAEOA to’o 31 Dezembru 2025
Jornalista: Abílio Elo Nini
Editór: Rafael Ximenes de A. Belo
