DILI, 08 Outobru 2025 (TATOLI)—Governu liuhusi Primeiru-Ministru, Kay Rala Xanana Gusmão, kuarta ne’e, liuhusi reuniauan Konsellu Minsitru aprova rezolusaun ba mandatu nomeasaun membru konsellu administrativu foun Rejiaun Administrativa Espesiál Oekusi Ambeno (RAEOA), Régio da Cruz, hodi hetan mandatu to’o 31 Dezembru 2025.
Notísia Relevante: PM Xanana nomea Régio da Cruz sai Prezidente Autoridade RAEOA
Lembra katak, antes ne’e, iha reuniaun Konsellu Ministru, kuarta (27 Agostu 2024) ne’e, Governu liuhusi reuniaun Konsellu Ministru aprova projetu rezolusaun ba ezonera estrutura hahú husi Prezidente no membru autoridade Rejiaun Administrativa Espesiál Oekusi Ambenu (RAEOA) iha 31 Agostu 2025.
Durante reuniaun ne’e, Primeiru-Ministru Kay Rala Xanana Gusmão aprezenta rezolusaun kona-ba Rejiaun Administrativa Espesiál Oekusi Ambenu (RAEOA) atu disolve komisaun ezekutiva ho hanoin atu estabelese Zona Ekonómika Espesiál Dezenvolvimentu Oekusi Ambenu (ZEEDOA).
Bazeia ba dokumentu ofisiál ne’ebe fó sai iha portál Governu, define katak Konsellu Ministru aprova projetu Rezolusaun Governu nian, ne’ebé aprezenta husi Primeiru-Ministru, Kay Rala Xanana Gusmão, ne’ebé nomeia membru foun Konsellu Administrasaun Fundu Espesiál Dezenvolvimentu nian ba Rejiaun Administrativa Espesiál Oekusi Ambenu (RAEΟΑ).
Signifika ho rezolusaun Governu nian ida-ne’e, Régio Servantes Romeia da Cruz Salu hetan nomeasaun, to’o 31 fulan-Dezembru 2025, ba kargu Prezidente Konsellu Administrasaun husi Fundu refere, Herculano Sousa no Amâncio Aguido Punef ba kargu vogais husi Konsellu hanesan.
Nune’e fundu espesiál dezenvolvimentu ba Rejiaun Administrativa Espesiál Oekusi Ambenu (RAEOA), ne’ebé kria husi Dekretu-Lei númeru 1/2015, loron 14 fulan-Janeiru, ho objetivu atu finansia projetu ne’ebé promove dezenvolvimentu ekonómiku no sosiál rejiaun nian, hodi asegura jestaun ida ne’ebé efisiente, seguru no transparente ba rekursus ne’ebé aloka ba ninia implementasaun.
Notísia Relevante: Prezidente Autoridade RAEOA atualiza progresu servisu ba PM Xanana
Jornalista : Alexandra da Costa
Editór : Cancio Ximenes
