BOBONARU, 26 Novembru 2025 (TATOLI) – Komisaun F ba Asuntu Saúde, Seguransa Sosiál no Igualdade Jéneru iha Parlamentu Nasionál (PN) hakarak inisia, iha Janeiru 2026, audiénsia públika ho instituisaun relevante sira kona-ba ezbosu Lei Adosaun ba Labarik.
Iha reuniaun plenária ordinária, iha 25 Novembru, meza Parlamentu Nasionál anunsiu admisaun no baixa ona ba Komisaun F proposta Lei nú 9/VI (2ª) – Regulamentu ba Prosesu Adosaun no procede alterasaun dahuluk ba Kódigu Sivíl, lei nú 10/2011, loron 14 Setembru.
Notísia relevante: Komisaun F rona opiniaun entidade relevante atu hamosu projetu-lei adosaun
“Iha inisíu Janeiru 2026, Komisaun F hamutuk ho entidade sira hotu avansa ba iha audiénsia no avansa ba iha [diskusaun] espesialidade. Espera katak iha Marsu nia laran lei-ida ne’e bele hetan promulgasaun husi Prezidente Repúblika”, deputada Maria Gorumali Barreto hato’o iha ámbitu komemorasaun Loron Mundiál Labarik ne’ebé realiza iha Jináziu Maliana.
Komisaun F hetan apoia husi parseiru Fundu Nasaun Unida ba Infánsia (UNICEF, sigla portugés) no mós Institutu Defeza Direitu ba Labarik (INDDICA, sigla portugés) no instituisaun sira seluk atu elabora didi’ak ezbosu Lei Adosaun ba Labarik.
Ezbosu lei ne’e deskreve kona-ba kualkér ema ne’ebé atu halo adosaun ba labarik tenke liuhusi desizaun Tribunál Rekursu hodi asegura katak labarik sira hetan protesaun, kuidadu, edukasaun, no bem-estar adekuadu.
“Kuandu nia haki’ak labarik, nia mai tau labarik hanesan nia oan rasik. Labele ba haki’ak labarik tau hanesan kriadu, halo separasaun oan haki’ak ho oan rasik, ne’e lei la autoriza”, dehan.
Lei Adopsaun Labarik nian regula transferénsia direitu no obrigasaun inan-aman nian husi labarik ida ba inan-aman adotivu liuhusi asaun legál hodi fó protesaun no kuidadu.
Notísia relevante: Horta lansa rejistu movél ba labarik foin moris iha munisípiu lima
Jornalista: Sergio da Cruz
Editora: Maria Auxiliadora
