PM Xanana lansa projetu perfurasaun bee iha Pante Makasar fasilita natar

OEKUSI, 27 Novembru 2025 (TATOLI) – Primeiru-Ministru (PM), Kay Rala Xanana Gusmão, kinta ohin, hala’o lansamentu ba projetu perfurasaun bee ba sistema irrigasaun natar ne’ebé lokaliza iha área Barasantu, suku Lalisuk, Sub-Rejiaun Pante Makassar, Rejiaun Administrativa Espesiál Oekusi Ambeno (RAEOA) hodi fasilita natar ektare 98 envolve natar na’in-334.

Notísia relevante:Agrikultura Oekusi hatur fatuk-inan reabilita irrigasaun iha Lalisuk fasilita natar ektare 25

Iha lansamentu ne’e, Primeiru-Ministru, informa, objetivu husi fasilidade perfurasaun ne’e tanba Governu iha kompromisu atu dudu ekonomia, hodi hamenus foos importadu. Tanba ne’e, Xefe Governu rekomenda ba empreza konstrutora ezekuta ho kualidade.

“Ohin ita hahú, saida mak ita husu bá kompañia tenke halo ho kualidade. Inan-aman sira tenke akompaña durante prosesu tomak, bainhira haree buat ruma la loos tenke hasee nune‘e sira hadi’a tanba benefísiu bá ema hotu,”   PM Xanana iha aldeia Manuimpena dehan, ohin.

Notísia relevante:Autoridade Lalisuk husu konstrui irigasaun haat hodi hasa’e produsaun

Iha biban ne’e, Xefe Suku Lalisuk, Hermenegildo Lalisuk, aprezenta ba Primeiru-Ministru, katak natar ektare 98 ne’e, mai husi fatin tolu, natar sira iha Panite ektare 38 ho uma-kain 88, natar sira iha Holosa ektare 36 ho uma-kain 150 no natar sira iha Barrasanto ektare 24 envolve uma-kain 96.

Tanba ne’e, autoridade komunitáriu ne’e, agradese Primeiru-Ministru no Autoridade RAEOA tanba projetu ne’e sei benefísia direita povu agrikultór sira iha suku Lalisuk.

“Ohin marka istória foun. Perfurasaun bee barak iha Oekusi maibé perfurasaun bee ba natar foin primeira-vez. Ha’u apresia tebes ho programa Governu nian ne’e. Perfurasaun ida-ne’e mak ita hotu hein, tanba mamramu nia hun mai husi suku Lalisuk, liuhusi biban ne’e, ha’u mós husu ba Primeiru-Ministru tau nafatin orsamentu bá RAEOA nune’e Autoridade sira bele utiliza ba hadi’a povu Atoni nia moris,” Hermegildo Lalisuk apresia.

Observasaun Jornalista Ajénsia Tatoli,I.P, partisipa iha seremónia lansamentu ne’e Ministru Obras Públikas (MOP), Samuel Marçal, Vise Ministru Infraestrutura, Júlio do Carmo, Sekretáriu Estadu Eletrisidade, Água no Saneamentu, Santos Noronha, Pároku Parókia São Miguel Arcanjo Padia’e, Padre Mariano Neto de Carvalho, Autoridade Seguransa no populasaun agrikultór.

Hafoin halo lansamentu, Primeiru-Ministru mós kontinua hala’o diálogu aberta, hodi fó oportunidade ba agrikultór sira hato’o preokupasaun no rekomendasaun liga ba asuntu agrikultura nian.

Notísia relevante:Agrikultór Cunha no Lalisuk iha Oé-Cusse hahú halai natar époka 2023

Entretantu, projetu perfurasaun ne’e responsabiliza hosi  empreza Bataculhari Unipessol, Lda ho durasaun tempu fulan-tolu, hahú hosi fulan-Novembru 2025 no sei finaliza iha fulan-Janeiru 2026.

Jornalista: Abílio Elo Nini

Editór: Rafael Ximenes de A. Belo