DILI, 27 Novembru 2025 (TATOLI)–Embaixadór Repúblika Indonézia iha Timor-Leste, Okto Dorinus Manik, iha tempu besik sei konklui nia misaun diplomata iha Timor-Leste.
Embaixadór Okto Manik ofisialmente despede Prezidente Repúblika, José Ramos-Horta, iha serimónia resepsaun diplomátika ne’ebé komemora aniversáriu Independénsia Indonézia ba da- 80 ne’ebé hala’o iha Salaun Multiusos GMN, Bebora, Dili.
Embaixadór Okto Manik hateten ninia mandatu iha Timor-Leste nu’udar períodu ida-ne’ebé signifikativu liu iha ninia kareira diplomátika tanba hetan onra atu serbí komunidade Timor-Leste liuliu iha Dili.
“Ha’u hamriik iha ne’e ho onra boot ba oportunidade atu serbí nu’udar Embaixadór Indonézia nian iha Dili,” Embaxadór ne’e dehan.
Nia hato’o apresiasaun ba Prezidente Repúblika, José Ramos-Horta no Primeiru-Ministru Xanana Gusmão tanba ho sira-nia lideransa hametin lasu amizade entre Indonézia no Timor-Leste,.
“Hanesan onra ida hodi serbí iha lideransa husi estadista na’in rua, Prezidente Ramos-Horta ho Primeiru-Ministru Xanana Gusmão. Ita-boot nia lideransa la’ós de’it orienta nasaun ida ne’e maibé hametin mós lasu sira maun-alin nian entre Indonézia ho Timor-Leste,” nia dehan.
Embaixadór Okto hatutan, nia mandatu nakonu ho istória ne’ebé signifikativu iha nasaun ne’e, tanba ne’e nia hato’o agradesementu tanba sai sasin ba marku importante oioin ba Timor-Leste liuliu nomesaun kardeál dahuluk Timor-Leste nian.
“Ha’u asiste mós ho orgullu nomeasaun husi kardeál Dom Virgílio do Carmo da Silva, fonte orgullu boot ida ba nasaun ida-ne’e,” nia hateten.
Nia mós asiste viajen nasaun ida-ne’e nian husi adezaun ba Organizasaun Mundiál Komérsiu nian to’o roteiru ba adezaun tomak iha ASEAN.
Diplomata ne’e hatutan, haree Timor-Leste loke-aan ba mundu hanesan onra boot ida oinsá mak nasaun ne’e buras no loke nia odamatan sira ba mundu mak pontu aas husi ninia kareira liuliu relasaun bilaterál ne’e abele sukat ho liafuan sira.
Okto Dorinus Manik mós fahe nia impresaun pesoál kona-ba estadia iha Timor-Leste.
“Bainhira ami foin to’o, ami mai iha misaun diplomátika ida, maibé saida mak ami hetan iha ne’e pesoál liu. Ami hetan amizade, laran-manas no komunidade ida-ne’ebé simu ami ho liman nakloke,” nia dehan.
Nia hakotu ninia diskursu ho agradesimentu kle’an ba apoiu, laran-di’ak no tanba halo ninia misaun diplomátika iha Timor-Leste.
“Ha’u hadomi espíritu Timor-Leste nian. Husik ha’u sita buat ida: ‘Hamutuk ita forte,” nia hateten.
Prezidente Repúblika, José Ramos-Horta, hato’o agradesementu espesiál ba Embaixadór Okto Dorinus nia dedikasaun durante nia mandatu iha Timor-Leste nu’udar diplomata, ne’ebé hametin ona relasaun entre nasaun rua (2) ne’e no hetan ona progresu signifikativu, inklui aumenta kooperasaun estratéjika, edukasaun, seguransa no komérsiu.
“Ha’u hakarak hato’o ha’u-nia apresiasaun kle’an ba dedikasaun, enerjia no matenek ne’ebé ita-boot sira lori hodi hametin amizade entre ita-nia nasaun rua. Ita-boot sira-nia serbisu halo ona kontribuisaun estraordináriu ida iha área hotu-hotu ita-nia kooperasaun nian,” Prezidente dehan.
Ramos-Horta nota mós katak saída husi Embaixadór Manik husik hela marka ida-ne’ebé labele haluha iha relasaun sira entre nasaun rua ne’e, bainhira espresa mós nia esperansa katak Prezidente indonéziu, Prabowo Subianto, bele hanoin atu hanaruk nia mandatu.
Jornalista : Hortencio Sanchez
Editór : Cancio Ximenes
