Governu atribui sertifikadu titularidade rai ba komunidade 30 iha Bobonaru
BOBONARU, 28 Novembru 2025 (TATOLI) – Ministru Justisa, Sérgio Hornai, atribui iha marjen komemorasaun tinan 50 Proklamasaun Independénsia, 28 Novembru 1975-2025, sertifikadu titularidade rai ba komunidade 30 iha munisípiu Bobonaru.
Atribuisaun sertifikadu hanesan mós halo husi Primeiru-Ministru, Xanana Gusmão, iha Rejiaun Administrativa Espesiál Oekusi Ambeno (RAEOA) ba totál parsela 205.
Ida-ne’e reprezenta parte importante husi esforsu Governu atu haburas seguransa jurídika no fortalese sistema administrativu kona-ba propriedade imobiliária iha Timor-Leste.
Ministru Justisa, Sérgio Hornai, dehan sertidaun simboliza prosesu kontínua ba reestabelesimentu direitu propriedade, klaridade jurídika, no promove dezenvolvimentu ordenadu iha área territoriál.
Notísia relevante: MJ kontinua fó prioridade atribuisaun sertifikadu rai iha 2025
“Iha Bobonaru, ita iha parsela 922, maibé tia bele atribui direitu propriedade 30 parsela titularidade ba ita-nia sidadaun sira. Ita sei bá ofisiál de’it, tuirmai sekretariu Estadu ho diretór-jerál sira sei halo serbisu para halo atribuisaun tuir malu. Ha’u hein serbisu ida-ne’e labele serimoniál de’it, ida-ne’e tenke loroloron ke povu mai ita hatán, mai husu ita halo levantamentu”, nia hateten iha Maliana, ohin.
Antigu Komisáriu Anti-Korrupsaun ne’e realsa katak sidadaun ne’ebé iha rai presiza mós iha titularidade nu’udar rekoñesimentu husi Estadu ba sira-nia direitu propriedade no móveis.
“Nune’e sira bele hakat bá fatin ne’ebé atu halo impresta osan karik, bá iha banku karik bele kréditu. Ema ruma karik atu mai arrenda sira-nia rai, entaun iha ona dukumentu ida Estadu rekoñese hodi sira bele halo”, nia esplika.
Benefisiáriu no atuál xefe suku Ritabou, Maximiano dos Santos Araújo, agradese tanba bele hetan ona titularidade rai husi Estadu ne’ebé sira hein durante tinan naruk nia laran.
“Agora ami sai ona na’in ba rai. Klaru katak ba futuru sei laiha tan disputa tanba bainhira atu hetan sertifikadu la’ós ida ohin mai foti kedas, más liuhusi prosesu naruk. Sertifikadu ne’e nia vantajen mak bele fasilita ami asesu ba kréditu no buat seluk tan”, nia hateten
Tuir relatóriu mapeamentu rai nian ne’ebé hala’o husi tinan 2019 to’o 2020, parsela 326.111 mak daudaun halo reverifikasaun, tanba maioria dadus iha mudansa ka hasoru hela disputa.
Notísia relevante: Agostu 2025, Governu sei atribui sertifikadu rai ba parsela 5000
Jornalista: Sergio da Cruz
Editora: Maria Auxiliadora
