DILI, 28 novembru 2025 (TATOLI) – Iha komemorasaun loron Proklamasaun indepedénsia ba dala-50, Sekretaria Estadu ba Igualidade, (SEI), Elvina de Sousa Carvalho, rekoñese katak feto nia partisipasaun iha funu signifikativa tebes tanba ne’e jerasaun foun sira iha obrigasaun atu prienxe ukun rasik ida-ne’e ho pozitivu no konsentidu.
“Husi pozitivu no konsentidu ne’e dehan atu kontribui buat ne’e mak di’ak tanba ita kontribui ba dezenvolvimentu ne’e ho kontribuisaun pozitivu signifika ita fó onra ba ita-nia erói no eroina sira-nia luta ba ukun rasik aan ida-ne’e”, nia dehan ba jornalista sira iha Palásiu Governu, ohin.
Nia énfaze, “Ita-nia indepedénsia ba dala-50 ne’e iha progresu partisipasaun feto iha promosaun igualdade feto ne’e progresu boot ona maibé agora iha setór hotu ita presiza hakbiit no hasa’e partisipasaun feto nian hanesan área teknolojia no matemátika, enjeñária, seguransa no justisa”.
Membru governu ne’e mós iha konfiansa boot tebes ba feto sira ne’ebe luta husi hori uluk kedas, hatudu sira-nia korajen no brani atu bele kontiribui ba ukun rasik aan no agora mós sira okupa iha kargu oioin.
Nia hatutan, “Hakarak enkoraja ema hotu tantu feto, mane difisiénsia no grupu LGBTQI hotu hotu tenke lolo liman ba malu hodi prienxe ukun rasik aan ida-ne’e ho di’ak tanba ita la hetan ho fasil. Tanba ukun rasik na ida ne’e ema barak mate”.
Jornalista: Ivonia da Silva
Editór: Rafael Ximenes de A. Belo
