DILI, 18 Dezembru 2025 (TATOLI)—Incanto Internasionál Institute, kinta ne’e, atribui sertifikadu ba formandu hamutuk 285 ne’ebé termina ona formasaun iha lian inglés durante fulan-tolu.
Na’in ba Incanto Internasionál Institue, Joanico Jerónimo, hateten formasaun ne’ebé hala’o tanba seevisu hamutuk ho Sekretariu Estadu Profesionál Empregu (SEFOPE) no Governu Australia hodi prepara timoroan sira ba servisu iha Austrália.
“Sira-ne’e maiória SEFOPE mak haruka mai tuir formasaun atu prepara sira ba servisu iha Austrália, entaun sira foku liu ba lian inglés, sira loloos ne’e 300, maibé 285 mak termina ona no simu sertifikadu seluk ne’e sei tuir nafatin formasaun sei termina fevereiru tian oin,” Joanico hateten ba jornalista sira hafoin fahe sertifikadu ba formandu sira.
Nia dehan, formandu hirak ne’e SEFOPE haruka ba Incanto maibé fatin referida iha produtu rasik atu haree sira nia level inglés depois mak fahe tuir kategoria, báziku, pre-intermediu no intermediu.
Iha fulan tolu de’it, estudante sira hatudu progresu ne’ebé notável iha rona, hakerek, no ko’alia impresiona profesór sira, família sira, no bainaka sira ho sira nia rezultadu aprendizajen ne’ebé destakadu iha koñesimentu, abilidade no atitude.
“Ami orgullu ho ami-nia estudante sira-nia realizasaun. Sira-nia dedikasaun no konfiansa hatudu katak ho hanoin ne’ebé loos, aprende Inglés loke duni oportunidade globál,” Joanico dehan.
Formasaun ne’e la’o hetan apoiu fundu husi SEFOPE ho montante rihun $80 liu husi Programa Apoiu Mobilidade Traballu Pasífiku (PLMSP) Scale-Up.
Nu’udar instituisaun akreditadu, Incanto fornese programa formasaun sira ne’ebé aliña ho padraun nasionál INDMO nian no mós referénsia internasionál sira, inklui padraun APTC, padraun City & Guilds UK, Avaliasaun Lian Inglés Grupu Mentari, no kurríkulu Avaliasaun Inglés Cambridge.
Liuhusi kontratu ho Palladium PLMSP no SEFOPE, Incanto komprometidu tomak atu implementa rekizitu hotu-hotu ho kualidade, akuntabilidade, no profisionalizmu ne’ebé aas liu, ikus fó duni rezultadu ne’ebé pozitivu.
Prioridade xave ida sei sai hanesan prestasaun ba formasaun Jerál Inglés nian, hodi ekipa traballadór timoroan sira ho lian no abilidade sira iha servisu fatin ne’ebé nesesáriu atu hetan asesu ba oportunidade sira ba mobilidade laborál ne’ebé alargada tuir Rejime PALM.
Iha sorin seluk SEFOPE Rogério Araújo Mendonça hateten, formasaun ne’e la’o tanba Governu Timor-Leste servisu hamutuk ho Governu Australia ho objetivu atu kapasita joven foinsa’e sira ne’ebé atu ba servisu iha Australia.
“Sira 300 ne’e agora naran iha hela sistema laran, maibé seidauk hetan oportunidade atu ba servisu iha Australia, ida-ne’e mak Governu Australia fasilita sira hodi tuir formasaun lian inglés iha fatin ne’e,” Rogério dehan.
Nia afirma, formandu hirak ne’ebé hetan ona sertifikadu, Governu sei hatama fila fali sira nia naran ba sistema atu nune’e empregadór husi Australia hili sira hodi ba servisu.
Nia hatutan, ba oin Governu nafatin koopera ho Incanto atu fasilita formasaun ba traballadór timoroan sira ne’ebé atu ba servisu iha Australia.
Dadaun ne’e Incanto iha sala-aula hamutuk neen (6) ho kondisaun ne’ebé di’ak ba estudante sira atu tuir formasaun.
Formadór iha Incanto ba lian inglés nian mai husi Australia, Reinu Unidu no Timoroan balu ne’ebé finaliza ona sira nia estudu lian inglés iha Universidade Nasionál Timor -Lorosa’e (UNTL).
Jornalista : Hortencio Sanchez
Editór : Cancio Ximenes
