KOVALIMA, 26 Dezembru 2025 (TATOLI)- Servisu Munisipál Edukasaun Kovalima simu ona relatóriu ezekusaun orsamentu konsesaun eskolár faze daruak husi eskola sira ne’ebé iha Munisípiu Kovalima.
“Relatóriu ne’ebé eskola submete mai iha servisu munisipál Edukasaun Kovalima, ita lori ba ona Servisu Munisipál Administrasaun Kovalima”, Diretora Servisu munisípiu Edukasaun Kovalima, Elda de Fátima dehan ba TATOLI iha Santa Rosa, ohin.
Dirijente Edukasaun ne’e, informa katak eskola-sira iha Kovalima hanesan ensinu báziku no ensinu pré-eskolár submete ona relatóriu ezekusaun tanba-sira halo ona levantamentu orsamentu konsesaun eskolár iha Banku Nasionál Komérsiu Timor-Leste (BNCTL) ba faze daruak nian.
Orsamentu konsesaun eskolár faze daruak ne’ebé orsamentu ba ensinu báziku rihun $143 no ba eskola pré-eskolár $7.572 nune’e eskola sira bele uza ba nesesidade eskolár.
Prosesu konsesaun eskolár ba 2025 ne’e durante fulan-11 tanba prosesu konsesaun eskolár ba faze dahuluk ba fulan-neen ne’ebé maka nia utilizasaun eskola ensinu báziku no ensinu pré-eskolár ba fase dahuluk ho nia orsamentu hamutuk $185,765.
Fó hanoin fali katak, Ministériu Edukasaun atribui konsesaun eskolár ba pré-eskolár bazeia ba Dekretu-Lei númeru 84,am artigu 7 ne’ebé altera husi Dekretu-Lei númeru 3/2016 kona-bá estatutu Administrasaun Munisipál no atribui konsesaun eskolár ba ensinu báziku tuir Dekretu-Lei númeru 32/2023, artigu 69 kona-bá gastu orsamentu konsesaun eskolár tuir nesesidade eskola.
Governu atribui konsasaun eskolár fahe ba kategória hanesan, konsesaun eskolár ba pré-eskolár ne’ebé responsabiliza husi Munisipál ho nia orsamentu kada estudante $0,75 no konsesaun eskolár ba ensinu báziku responsabiliza husi Ministériu Edukasaun ho nia orsamentu kada alunu $2.00.
Jornalista:Celestina Teles
Editór:Florencio Miranda Ximenes
