BOBONARU, 31 Dezembru 2025 (TATOLI)-Servisu Rejistu Verifikasaun Emprezariál, Institutu Públiku (SERVE, I.P.) Delegasaun Territoriál Munisípiu Bobonaru, arrekada husi Janeiru to’o Dezembru 2025, reseita hamutuk $18.909 ba kofre Estadu.
Koordenadór SERVE munisípiu Bobonaru, Leopoldo Pereira Fernandes, dehan reseita hirak-ne’e halibur liuhusi atividade kliente sira mai halo renovasaun dokumentu sira hanesan sertidaun rejistu komersiál, reimprime sertidaun rejistu komersiál, pedidu rejistu foun no renovasaun ba ezersísiu atividade ekonómika neʼebé sujeita atu hetan lisensa setoriál selu taxa $60 kada atividade tuir Dekretu-lei númeru: 83/22, loron 23 Novembru.
Aleinde ne’e, rekolla mós husi empreza sira neʼebé halo alterasaun objetu, aumenta atividade, alterasaun sede, administradór, órgaun sosiál, kapitál sosiál no seluk tan.
Notísia relevante: SERVE Bobonaru halibur reseita $4.864 iha trimestre daruak 2025
“Iha fulan janeiru ita hetan $780, Fevereiru $2.135, Marsu $2.215, Abril $1.587, Maiu $1.366, Juñu $1.911, Jullu $2.393, Agostu $1.494, Setembru $1.082, Outubru $1.668, Novembru $1.242, Dezembru $1.036, totál reseita 2025 ne’ebé ita hetan $18.909”, nia relata ba Tatoli, ohin.
Relembra katak, iha 2020, SERVE Bobonaru rekolla reseita hamutuk $1.001, 2021 ($765.50), 2022 ($14.052), 2023 ($14.459,15), no 2024 ($22.720).
Hahú husi 2013 to’o 2025, SERVE, I.P. munisípiu Bobonaru rejistu atividade komersiál hamutuk 2.723.
Notísia relevante:Janeiru-Abríl: SERVE Bobonaru kontribui reseita $6,717 ba kofre Estadu
Jornalista: Sergio da Cruz
Editora: Maria Auxiliadora
