BOBONARU, 12 Maiu 2025 (TATOLI)—Servisu Rejista Verifikasaun Emprezariál, Institutu Públiku (SERVE, IP) sukursál Munisípiu Bobonaru, hahú husi Janeiru to’o abríl 2025 ne’e, rekolla no kontribui reseita hamutuk $6.717.00 hodi kontribui ba kofre Estadu.
Notísia Relevante: 2023, SERVE Bobonaro rekolla rihun $14 ba kofre Estadu
Koordenadór SERVE, I.P Munisípiu Bobonaru, Leopoldo Perreira Fernandes, konfirma iha fulan Janeiru konsege halibur $780.00, Fevereiru $2, 135.00, Marsu $2, 215.00, Abril $1, 587.00 no totál hamutuk $6,717.00.
“Ita rekolla reseita hirak ne’e husi empreza sira-ne’ebé mai hato’o pedidu alterasaun objetu, aumenta atividade, alterasaun sede, administradór, orgaun sosiál, kapitál sosiál no seluk tan, bazeia ba pedidu ne’ebé submete husi negosiante, emprezáriu no emprezária referente,” nia informa ba Agência Tatoli iha nia kna’ar fatin, segunda ne’e.
Hahú husi Janeiru to’o Abril 2025, SERVE, I.P sukursál Munisípiu Bobonaru rejista ema na’in 86 mak halo rejistu komersiál ne’ebé fahe ba tipu negosiu ka tipu Empreza em Nome Individuál (ENIN) 72, Sosiedade Unpessoál por Quotas Limitada (Unipessoal, Lda) 12 no Sosiedade por Quotas Limitada, Lda, ne’e ida ida (1).
Enkuantu iha tinan 2024 liuba ne’e, SERVE, I.P sukurál Munisípiu Bobonaru susesu no halibur Reseita hamutuk $13,459.15.
Notísia Relevante: Janeiru-juñu 2024, SERVE Bobonaro halibur reseita rihun $13-resin
Jornalista : Sergio da Cruz
Editór : Cancio Ximenes
