BOBONARO, 24 jullu 2024 (TATOLI) – Hahú husi fulan-janeiru to’o juñu tinan 2024 ne’e, Servisu Rejistu no Verifikasaun Emprezariál, Institutu Públiku (SERVE,IP) sukursál munisipíu Bobonaro konsege halibur hamutuk $13,380 hodi kontribui ba kofre estadu.
Koordenador SERVE,IP sukurál munisípiu Bobonaro, Leopoldo Pereira Fernandes, informa, montante hirak-ne’e rekolla iha janeiru $1,624, fevereiru $1,909, marsu $1,227, abríl $3,252, maiu $2,453 no juñu $1,909.
Notísia relevante: 2023, SERVE Bobonaro rekolla rihun $14 ba kofre Estadu
“Reseita hirak-ne’e ita rekolla liuhusi ita-nia kliente sira-ne’ebé mai halo renovasaun ba sira-nia sertidaun rejistu komersiál, depois sira balu mai halo alterasaun ba sira-nia objetu atividade, aumenta atividade, balu halo alterasaun ba sede, balu altera administradór sosiál no seluk tán,” nia informa ba Tatoli, iha Maliana, kuarta ne’e.
Nia dehan, iha tempu badak sei propoin ba SERVE,IP nasionál atu reativa hikas programa rejistu movél ne’ebé durante ne’e paradu hela, nune’e hakbesik serbisu atendimentu públiku ba iha baze.
“Ita nia komunidade sira iha área rurál sira-nia hela-fatin ne’e dook, depois kondisaun estrada mós ladi’ak, menus informasaun entaun sira la konsege hakat mai to’o edifísiu SERVE ne’ebé agora situada de’it iha Maliana,” nia katak.
Atividade rejistu movél ne’e realiza atu formaliza atividade negósiu sira-ne’ebé mak la’o hela to’o agora seidauk rejistu iha SERVE.
Nia dehan, rejistu komersiál ne’e iha vantajen tanba operadór ekonómiku sira bele lori dokumentu ba asesu kréditu iha Banku, alende ne’e bele ajuda fornese dadus ba instituisaun relevente ne’ebé presiza inklui estudante sira-ne’ebé halo peskiza ba atividade ekonómiku ne’ebé la’o iha territóriu laran.
Nia husu ba komunidade sira bainhira atividade rejistu movél implementa, kualkér ezersísiu atividade ekonómiku ne’ebé la’o tenke rejistu, tanba SERVE hanesan instituisaun ida-ne’ebé atu rejistu no halo emisaun ba dokumentu komersiál.
“Bainhira negosiante sira hala’o atividade negósiu maibé la rejistu mak sei hetan multa tanba viola dekretu lei SERVE, I.P. nune’e entidade sira viola lei númeru 10/2017-lei sosiedade komersiál, dekretu lei numeru 16/2017-rejistu komersiál no dekretu lei 83/2022-lisensiamentu atividade ekonómika,” nia katak.
Daudaun ne’e SERVE,IP sukursál Bobonaro iha forsa traballu hamutuk 20.
Notísia Relevante: SERVE atribui ona lisensa komersiál ba kioske 26 iha Lolotoe
Jornalista: Sérgio da Cruz
Editór: Evaristo Soares Martins
