DILI, 06 Janeiru 2026 (TATOLI)—Diretór Nasionál Rekursu Umanu Ministériu Edukasun (ME), João Amaral informa daudaun ne’e Ministériu Edukasaun ho Institutu Nasionál Seguransa Sosiál (INSS) hahú prosesa ona pagamentu ba profesór reforma obrigatória hamutuk 1.493.
“Tuir Lei Númeru 9/2025 ne’ebé promulga husi Prezidente Repúplika, profesór na’in-1.493 no funsionáriu Ministériu Edukasaun na’in-45 maka tama reforma obrigatória hahu husi 01 Janeiru tinan ne’e,” nia dehan ba jornalista sira iha nia kna’ar fatin, Vila-Verde, Tersa ne’e.
Nia esplika kada ema atu hetan montante hira orsida sei konta hahú husi 2002 depoiz restaura independénsia mai to’o iha Setembru 2017.
“Ida-ne’e ita bolu dehan rejime tranzitóriu, depoiz husi Outobru 2017 mai to’o nia reforma ita bolu kontribuisaun,” nia subliña.
Kona-ba profesór sira-ne’ebe atu substitui profesór reformadu sira, nia informa, ministériu prepara ona lista no hein atu substitui iha tempu badak.
“Tanba ita-nia bolsa kandidatu daudaun ne’e sei iha 903 ba ensinu báziku no mós ita iha bolsa kandidatu ba ensinu sekundáriu. Karik ami halo xamada ba sira, sira aseita koloka ba ensinu báziku, ita koloka. Karik rejeita sira mantein iha bolsa kandidatu,” João tenik.
Jornalista: Osória Marques
Editór: Xisto Freitas da Piedade
