DILI, 15 Janeiru 2026 (TATOLI)—Ministra Solidariedade Sosiál no Inkluzaun, Verónica das Dores sosilita Prezidente Institutu Nasionál Seguransa Sosiál (INSS), Zeferino da Costa Bobo, ho nia membru Konsellu Administrativu atu halo servisu ho responsabilidade ba asuntu seguransa sosiál ba mandatu tinan tolu, 2026-2028.
Estrutura Konsellu Administrativu INSS mak Zeferino da Costa Bobo (Prezidente), vogál na’in-rua, reprezenta Governu hanesan Solange de Fátima Borges ho Gemito do C. Amaral de Jesus, Reprezentante hosi Kámara Komérsiu Indústria Timor-Leste (CCI-TL-sigla portugeza) mak Sansão Gomes no Reprezentante Konfederasaun Sindikatu Timor-Leste (KSTL), Almério Januario Vila Nova Gouveia.
“Bá-oin, ita hotu sei simu previléjiu boot mak hanesan ema sei tolok, insulta, difama, tuda no baku. Tanba ne’e, tenke fuan boot no aten-brani. Nune’e, hahú ohin bá-oin, halo ho responsabilidade, transparénsia, integridade, koordenasaun, kolaborasaun no domin ba misaun dignu ida-ne’e,” Ministra Verónica dehan nia diskursu ba jornalista sira iha serimónia pose ba Prezidente Konsellu Administrasaun Institutu Seguransa Sosiál, iha salaun MSSI, Kaikoli, Kinta ne’e.
Notísia relevante: Governu deside ezonera Arlindo Pinto husi kargu Prezidente INSS
Ministra subliña MSSI sei foka maka’as iha parte tolu (3) husi dezenvolvimentu Institutu Nasionál Seguransa Sosiál hanesan jestaun administrasaun, jestaun implementasaun baze dadus, no jestaun Fundu Rezerva Seguransa Sosiál.
“Kabe ba konsolidasaun sistema ne’e, presiza tebes koordenasaun no konsultasaun iha área oioin, tanba orsamentu referidu maihusi kontribuisaun empregadór no trabalhadór povu Timor-Leste nian no estranjeiru ne’ebé hela iha ita-nia rain,” nia dehan.
Entretantu, Prezidente Institutu Nasionál Seguransa Sosiál, Zeferino da Costa Bobo, hateten ekipa ida-ne’e sei kontinua servisu ne’ebé mak Prezidente INSS sesante sira halo ona.
“Ita sei kontinua servisu ne’ebé mak iha ona. Ita hatene katak durante ne’e presta servisu maibé ita mós rekoñese katak ita hasoru difikuldade. Hanesan atendimentu ba ferik-katuas sira seidauk másimu. Entaun, ita tenta atu hadi’a ida-ne’e. Tanba ita identifika iha problema rua mak distánsia dook hosi fatin simu osan no sira seidauk iha kartaun identidade,” nia informa.
Bobo hatutan, atu solusiona problema ne’e, presiza servisu hamutuk ho Diresaun Nasionál Notariadu nian para fasilita dokumentu nesesáriu sira tanba problema rua ne’e mak sempre públiku kestiona maka’as.
“Problema ne’ebé hasoru mak fatin ba pagamentu dook husi sira-nia hela fatin, tantu maihusi rejime kontributivu ka naun-kontributivu. Dezafiu ida seluk mak iha jestaun administrativu, balun rejista ona ka naran iha ona sistema, maibé to’o tempu ba foti osan, osan la tama. Ida-ne’e mak ita presiza haree no hadi’a,” nia esplika.
Prezidente INSS sesante, Arlindo Pinto enzoneradu hosi Konsellu Ministru (KM), iha 07 Janeiru, ne’ebé antes ne’e simu pose iha 16 Fevereiru 2024.
Jornalista: Osória Marques
Editór: Xisto Freitas da Piedade
