DILI, 16 Janeiru 2025 (TATOLI)—Vise Primeiru-Ministru (PM) no Ministru Koordenadór Asuntu Sosiál, Ministru Dezenvolvimentu Rurál no Abitasaun Komunitária, Mariano “Assanami” Sabino, Sesta ne’e, hamutuk ho Estrutura Prezidente Country Coordinating Mechanism (CCM), Zelia Fernandes, diskute moras malária, tuberkuloze no HIV/SIDA.
“Plataforma ida-ne’e oinsá mak buka nafatin apoia finansa hosi li’ur maibé mós presiza koordena didi’ak kompromisu Governu atu apoiu ne’ebé foka ba moras tolu. Ita deklara katak malária laiha ona maibé nafatin kontrola hodi laiha para sempre. Agora moras ne’ebé kontinua iha mak moras tuberkuloze ho HIV/SIDA. Ita hotu hatene katak moras HIV/SIDA iha númeru boot, maibé halo ona kontrolu ba balun,” Vise PM Assanami dehan ba jornalista sira iha Palásiu Governu, Sesta ne’e.
Tanba ne’e mak Vise Assanami hateten iha enkontru ohin ne’e bele kria padraun implementasaun ne’ebé di’ak hodi iha rezultadu.
Notísia relevante: OMS entrega ona sertifikadu livre husi Malária ba MS
“Ohin iha ami-nia enkontru ne’e husu atu iha padraun implementasaun ne’ebé ekipa tenke monitoriza didi’ak hodi osan ne’ebé ema apoiu ne’e to’o duni objetivu,” Assanami tenik.
Entretantu, Prezidente Country Coordinating Mechanism (CCM), Zelia Fernandes informa oinsá atu atende tuberkuloze ho HIV/SIDA ho di’ak mak presiza servisu integradu.
“Agora ita iha vizita ‘Saúde na Família’, programa integrdu saúde ne’ebé ministériu saúde halo konjunta hodi konsulta ba moras tolu ne’e. Ohin ami ko’alia ho primeiru-ministru katak moras tuberkuloze la’ós moras singularmente maibé kontribui mós hosi moras seluk. Pur-ezemplu má-nutrisaun, entaun presiza halo intervensaun integrada. Ita esforsu atu kontinua halo atu servisu ba asuntu sira-ne’e,” nia subliña.
Jornalista: Osória Marques
Editór: Xisto Freitas da Piedade
