DILI, 20 Janeiru 2026 (TATOLI)-Administrasaun Aeroportu no Navegasaun Aérea Timor-Leste, Empreza Públika (ANATL, E.P, sigla portugés) hahú loke atendimentu ajusta dokumentu ba komunidade afetadu na’in-38 iha Suku Madohi ne’ebé afeta projetu reabilitasaun espansaun pista aeroportu Komoro.
Notísia Relevante: Empreza Waskita Karya mobiliza ekipamentu atu halo luan pista Aeroportu Komoro
Prezidente, Administrasaun Aeroportu no Navegasaun Aérea, Romualdo António Soares, hateten komunidade afetadu kuaze barak liu mak Governu indemniza ona no sei hela de’it afetadu na’in-57 mak sei disputa rai ho Governu, entaun ida-ne’e mak halo hela liña koordenasaun maibé atu dehan de’it katak aferadu na’in-19 mak indemnuza ona no hela na’in 38 mak seidauk selu.
Nune’e komisaun konjunta mantein loke atendimentu ba komunidade na’in-38 hodi submete sira-nia dokumentu atu prosesa ba indemnizasaun.
“Ami loke atendimentu hahú ohin loron ba komunidade afetadu durante loron 15, atu ajusta dokumentu kona-ba uma no ai-horis, atu ami bele halo verifikasaun haruka ba Ministériu Finansas hodi prosesa indemnizasaun ba sira. Enkuantu kona-ba rai ne’e la’ós ami-nia servisu maibé ne’e Ministériu Justisa,” Prezidente ANATL ne’e informa ba Agência Tatoli iha nia kna’ar fatin,Komoro, ohin.
Aleinde ne’e, nia relata, Ministériu Justisa mós fó ona notifikasaun ba komunidade afetadu sira iha loron 15 fulan-Janeiru 2026 ho prazu durante loron 90, nune’e husu ba komunidade afetadu sira bele koopera malu hodi habadak prosesu ne’e lalais, tanba rai ne’e afavór ba Governu signifika la’ós rai privadu.
“Bainhira komunidade la koopera mak ami sei entrega kompeténsia ne’e ba Governu atu halo eviksaun no sei la indemniza. Tanba ne’e, di’ak-liu koopera atu ami trata imi ho dignu, enkuantu Governu mak responsabiliza ne’e maneira sobu rahun maske imi la preparadu atu haloot sasán,” nia dehan.
Tanba prosesu dezenvolvimentu espasaun pista iha aeroportu ne’e kontinua la’o tuir sirkulár ne’ebé mak iha no empreza Waskta Karya mós preparadu atu implementa projetu ida-ne’e.
Enkuantu iha loron dahuluk ba atendimentu ne’r iha komunidade afetadu na’in-haat (4) mak halo ona ajustamentu sira-nia dokumentu ba komisaun organizadora.
Notísia Relevante: MTK orienta komisaun ministeriál notifika komunidade afetadu ba espansaun aeroportu
Jornalista : Alexandra da Costa
Editór : Cancio Ximenes
