DILI, 21 Janeiru 2026 (TATOLI)-Prezidente Konsellu Ezekutivu Bee Timor-Leste, Empreza Públika (BTL, E.P), Gustavo da Cruz, informa katak BTL rejista, iha tinan 2025, kliente ne’ebé asesu ona ba bee-moos hamutuk 36.044.
Kliente sira ne’ebé asesu bee-moos ne’e aumenta tanba sistema melloramentu bee-moos ne’ebé kontinua halo iha postu administrativu sira iha territóriu tomak.
Gustavo esplika katak husi kliente 36.044 ne’ebé asesu ona ba bee-moos, 22.666 mak uza ona metru kontadór no 13.378 asesu bee liuhusi sistema BTL nian, maibé seidauk iha metru kontadór.
Tuir nia, husi dadus ne’ebé rejista iha tinan kotuk, BTL mós halo notifikasaun ba kliente 1.534 ne’ebé la selu tarifa bee, halo koneksaun ilegál, uza sanyo hodi dada/xupa bee direta ba kanu distribuisaun no tranzmisaun, nomós sobu ekipamentu bee ne’ebé ekipa BTL monta ona.
Husi númeru ne’e, 1.474 mak la selu tarifa bee durante fulan tolu ba leten no 60 mak halo koneksaun ilegál no sobu instalasaun bee hodi halo ligasaun ilegál.
Husi atividade sira ne’e hotu BTL rekolla reseita ba kofre Estadu, hahú husi kanalizasaun bee, selu bee kada fulan husi konsumidór, teste bee iha laboratóriu, fa’an bee-moos, fakar bee fo’er iha Tíbar no seluk tan hamutuk $2.116.000.
Nia dehan populasaun iha fatin balun iha Dili ne’ebé seidauk asesu bee-moos, BTL kontinua halo esforsu iha tinan-ne’e hodi kanaliza bee-moos ba sira.
“Ita nafatin halo esforsu dada bee-moos hotu ba komunidade. Hanesan hothotu hatene Manleuana ne’ebé uluk bee laiha, maibé daudaun BTL hahú dada hotu ona bee-moos ba komunidade”, nia promete.
Nia parte mós husu ba públiku labele baku bee hodi halo ligasaun ilegál, tanba ida-ne’e fó impaktu ba ambiente.
Notísia relevante: Komunidade asesu bee-moos husi kanalizasaun públiku foin atinje 49%
Jornalista: Arminda Fonseca
Editora: Maria Auxiliadora
