BOBONARU, 21 Janeiru 2026 (TATOLI) – Diresaun Servisu Munisipál Edukasaun (DSME) Autoridade Munisípiu Bobonaru submete, iha kinta-feira, 22 Janeiru, pedidu emerjénsia ba Ministériu Edukasaun (ME) atu reabilita Eskola Báziku Sentrál (EBC, sigla portugés) suku Tapo, postu administrativu Bobonaru, ne’ebé hetan danifikasaun hafoin akontese anin no udan ho intensidade boot iha loron 20 ne’e.
Diretór DSME Munisípiu Bobonaru, Miguel Freitas, dehan hafoin akontesimentu ekipa bá kedas terrenu hodi halo observasaun ba infraestrutura edukativa ne’ebé anin sobu.
“Ami-nia orientasaun ba diretór EBC Tapo mak ohin loron nia tenke tun mai para halo hotu prosesu administrativu para aban ami bele lori bá nasionál. Pelu menus bele atende ida emerjénsia nian, tanba daudaun ne’e estudante sira labele ona uza sala ne’e tanba nia kakuluk loke totál”, nia informa ba Tatoli, ohin.
Miguel Freitas mós orienta ona dirijente eskola atu buka mekanizmu oinsá bele akumula estudante sira nafatin partisipa iha prosesu ensinu no aprendizajen.
Antigu Diretór EBC Gumer Lourba ne’e subliña katak DSME mós sei husu ekipa téknika ME atu dezeña foun modelu uma-kakuluk, nune’e obra ne’ebé harii ho orsamentu Estadu labele afeta beibeik ba dezastre naturál.
“Ita atu halo mudansa ba fatin, ha’u hanoin difísil uitoan, tanba iha ne’e fatin seguru no espasu luan atu dezenvolve tan infraestrutura. Ne’ebé ha’u hanoin sira tenke kuda ai para bele tahan anin, kuandu husik hela de’it hanesan ne’e tinan-tinan tenke akontese hanesan ne’e”, nia hakotu
EBC Tapo nia saladeaula tolu mak danifika, ne’ebé konstrui husi fundu projetu komunitáru tinan 2015. Eskola ne’e akumula estudante sira husi suku Oe-leu no Leber hamutuk 300-resin, tuir dadus anu letivu 2025 nian.
Notísia relevante: Anin-boot danifika saladeaula tolu iha EBC Tapo
Jornalista: Sergio da Cruz
Editora: Maria Auxiliadora
