DILI, 22 Janeiru 2026 (TATOLI)—Estudante Departamentu Edukasaun Fízika no Desportu husi Universidade Nasionál Timor Lorosa’e (UNTL) rekomenda ba Reitór Eleitu, Joviano António da Costa no Ministériu Ensinu Superiór, Siénsia no Kultura (MESSK) atu transforma departamentu ne’e husi nivel diploma III ba lisensiatura.
Estudante Departamentu Edukasaun Fíkiza no Desportu UNTL, Cesarina da Silva Pinto, dehan nesesáriu tebes atu muda diploma III ba lisensiatura, nune’e bainhira sira ramata estudu bele asesu ba bolsa kandidatura ensinu sekundáriu nian.
“Ami diploma III finalista barak ona maibé atu aplika ba vaga ensinu sekundáriu hodi bá hanorin labele, tanba atu hanorin ensinu sekundáriu tenke ho nivel lisensiatura. Ida-ne’e ami husu ba Governu muda Departamentu Desportu ba nivel lisensiatura,” nia dehan ba TATOLI iha nia kna’ar fatin, Fakuldade Edukasaun, Liceu, Kinta ne’e.
Iha fatin hanesan, Cipriana Alex Mendonça hateten daudaun ne’e kuaze eskola sekundáriu sira iha teritórriu enfrenta menus profesór matéria desportu, tanba ne’e manorin husi matéria seluk mak hanorin fali.
“Tan ne’e, ami ne’ebé estudu iha área desportu, husu atu muda Departamentu Desportu husi diploma III ba lisensiatura, atu ami ramata husi ne’e ami bele aplika ba vaga sekundáriu hodi bá hanorin,” nia sujere.
Nune’e mós, estudante Ângela Martins sujere ba parte relevante, antes atu hasa’e Departamentu Desportu husi nivel diploma III ba lisensiatura, tenke mellora uluk kondisaun no númeru dosente mestradu.
“Dahuluk hadi’a uluk kondisaun ba dosente no ami estudante sira. Bainhira dosente ho nivel diploma III no lisensiatura de’it, maibé dosente husi área mestradu tenke barak hafoin hasa’e ba lisensiatura,” nia tenik.
Entretantu, Vise Diretór Departamentu Edukasaun Fízika no Desportu UNTL, Francisco Barbosa Pereira, informa tinan barak ona sira halo esforsu no aprezenta ba Konsellu Jerál UNTL maibé estrutura reitór dada to’o agora.
“Ami prontu nafatin, tanba ami nia inisiativa hakarak kursu Departamentu Desportu tenke eleva ba lisensiatura tanba peskiza ne’ebé ami halo maioria eskola sira iha Timor-Leste profesór ne’ebé hanorin maioria husi área seluk mak hanorin, maibé ita-nia graduadu barak liu responde iha eskola sira iha kapitál Dili,” nia haktuir.
Maibé, tuir nia, eskola sira iha territóriu nasionál ba aula matéria desportu profesór fó de’it bola ba estudante sira halimar, laiha ema ida mak lidera.
“Ita presiza rekruta estudante graduadu sira atubele responde. Ita labele hein lisensiatura depoiz ita sakrifika estudante sira iha eskola. Más, sira iha direitu atu iha siénsia ne’ebé loos husi ema ne’ebé loos,” Francisco esplika.
Istória Departamentu Edukasaun Fíkiza no Desportu UNTL
Departamentu Desportu harii husi Governu Dahaat, ne’ebé lidera hosi Sekretáriu Estadu Juventude Desportu, Miguel Marques Manetelu no antigu Reitór UNTL, Benjamin de Araújo Corte-Real nia tempu, iha 10 Janeiru 2010.
Departamentu Desportu prodús ona graduadu 289 no nia estudante ativa hamutuk na’in-160, dosente permanente na’in-lima (5) no parte tempu na’in-ida (1), dosente internasionál na’in-neen (6), na’in-haat hosi Kuba no na’in-rua hosi Portugál.
Jornalista: Osória Marques
Editór: Xisto Freitas da Piedade
